*** ئ‍ىشىق سالدى سەھرادا " چوغلۇق " ***
تۇرسۇن ئ‍ىمىن (شەيدايى )
شىنجاڭ يازغۇچىلار جەمئىيىتىنىڭ ئەزاسى

يۈرۈپتىمەن ئ‍ىلگىرى توۋا ،
نازىنىنلار شەھەردىلا دەپ .
دەريا بويى خىلۋەت سەھرادا ،
كۆرۈپ " چوغلۇق "قالدىم تەمتىرەپ .

گۈللەر شاھى شۇمىكىن دېدىم ،
بىتۇيۇقلا بولغاندا پەيدا .
گۈلگە خۇمار -ھېرىسمەن ئ‍ىدىم ،
بىراق بۇنچە ئ‍ەتمىگەن شەيدا .


چۈشكىنىدە ئ‍اڭا نىگاھىم ،
قالدۇردى تاڭ ئ‍اھۇ كۆزلىرى .
سالاملىرى شۇنچە مۇلايىم ،
بال -ھەسەلدىن شېرىن سۆزلىرى .

كۆتىرىپتۇ قولىدا چىلەك ،
جۇلالىنار چېھرىدە باھار .
جۈپ زىناقى تىترىتەر يۈرەك ،
بوي -بەستىدىن چېچىلار ئ‍ىپار .


قېشى قارا ،كىرپىگى تال -تال ،
زىلۋا بەدەن ،لەۋلىرى گىلاس .
ئ‍وڭ مەڭزىگە قونۇپتۇ ئ‍ۇز خال ،
قىلدىم ئ‍ۇنى پەرى دەپ قىياس .


چىققاندۇ دەپ قانداق جەننەتتىن ،
ئ‍ۆز -ئ‍ۆزۈمگە تاشلىدىم سۇئال ؟!
يوقتۇر ئ‍ىزنا قۇرۇق سۆلەتتىن ،
تۇرار بالقىپ تەبىي سەبى ھال .

قارا تۈنمۇ سۇمبۇل چېچىغا ،
رەڭ تالىشىپ ئ‍ەيلەركەن ھەسەت .
چۈشسىمۇ ئ‍اي ئ‍ەگەر قېشىغا ،
بەسلىشەلمەي چېكەركەن ھەسرەت .


ئ‍ون سەككىزگە يەتمىگەن يېشى ،
قىلار جەۋلان قىزلىق لاتاپەت .
گۈزەللىكتە يوقتۇر تەڭدېشى ،
يولۇقمىغان بۇنداق قىياپەت .

يېڭىلگەنگە بەردىم شۇ ئ‍ان تەن ،
تېپىلىدۇ پەردازسىز قىز ئ‍از .
كەيگەن ئ‍ېسىل كېيىمى بىلەن ،
تۈزەپ ھۆسىن ئ‍ەيلەپتىكەن ناز .

خان ئ‍ەتلەستىن كېيىپتۇ ئ‍ىگىن ،
ئ‍ۇچىسىغا ياراشقان شۇنداق .
ساپما كەشى پۇتىدا ،تەھسىن -
نازاكىتى چانمىغان بىراق .


شىرىس ياغلىق چىگكەن بېشىغا ،
ئ‍ۆتتى سۆيۈپ چېھرىنى شامال .
كۈندەشلىگىم تەپتى تېشىغا ،
( ئ‍اشىقلارغا بۇ ئ‍ورتاق مىسال ).


تەققى -تۇرقى ئ‍اددىيلا شۇنچە ،
لېكىن قەلبى غۇبارسىز بەرنا .
چوغلۇق كەبى ئېچىلغان  غۇنچە ،
شەرمى -ھايا بابىدا تەنھا .

ئەدەپ بىلەن ئۆتۈپ يېنىمدىن ،
دەريا تامان كەتتى قول سېلىپ .
ئەس -ھۇشۇمنى يوقاتتىم بىردىن ،
يۈرىكىمنى كەتكەندەك ئېلىپ .


«گۈل سەرخىلى كۆپقۇ ! »دەپتىمەن ،
مەدھىيلىسە چوغلۇقنى شائىر .
باغرىمغا ئوت ياقتى ئۇ لىۋەن ،
بولدى زۆھرە ،مەن بۇ دەم تاھىر .

كۆرەلمىدىم كۈتسەممۇ ئۇزاق ،
پۇچىلاندىم ئىشقىدا كۆيۈپ .
ئەھدى قىلدىم تارتىشقا پىراق ،
ئۆمۈر بويى شۇنىلا سۆيۈپ !

ئاپتور : بورتالا شەھەرلىك رادىئو -تېلېۋىزىيە ئىستتانسىسىدىن