بەرمە

ئۈچتۇرپاندىن ئەسقەر

《ئاغزى دوست》 لارغا ئاغزىڭدا دوست بول ،

 ئىلكىڭدىن بىر تال قىلىڭنى بەرمە .

 ئۆزۈڭ تەر تۆكۈپ ، ئۆزۈڭ كۆكلەتكەن

 بېغىڭدىن بىر تال گۈلۈڭنى بەرمە .

 ئالدايدۇ سېنى يالغان ۋەدىسى ،

 قولىنى سۇنسا قولۇڭنى بەرمە .

 ئاغزى دوستلىرىڭ پەگادا تۇرسۇن ،

 مەرىكەڭگە كەلسە تۆرىڭنى بەرمە .

 ئىنسان ۋۇجۇدى بىر تىلسىم دۇنيا ،

 سۆيگۈڭ بولسىمۇ سىرىڭنى بەرمە .

 سەندىن ئالغاننى دەيدۇ ئۆزىنىڭ ،

توڭلاپ ياتسىمۇ تونىڭنى بەرمە .

ئالتۇندىن ئەۋزەل بىلگىن كۆڭلۈڭنى ،

 دۇر-زەر بەردى ！ دەپ دىلىڭنى بەرمە .

 يالغان دوستلاردىن دۈشمەنلىك كېلۇر ،

 رولىڭنى بەرمە ، يولۇڭنى بەرمە .