ئەسلەنمەيدىغان تۇنجى قېتىم

مەرھابا يۈسۈپ ( مەھبۇب )

 تۇنجى قېتىم مېنى يىغلاتقىنىڭنى ئۇنتالمىدىم، ئەمما تۇنجى قېتىم قاچان يىغلىغىنىم ئېسىمدە يوق ! 

 تۇنجى قېتىم سېنى سۆيگىنىمنى ئۇنتالمىدىم، ئەمما مېنى تۇنجى قېتىم كىمنىڭ سۆيگىنى ئېسىمدە يوق !

تۇنجى قېتىم مېنى جېنىم دېگىنىڭنى ئۇنتالمىدىم، ئەمما مەن تۇنجى قېتىم كىمنىڭ جېنىدەك بولغانلىقىم ئېسىمدە يوق ! 

 تۇنجى قېتىم سېنى قۇچاقلىغىنىمنى ئۇنتالمىدىم، ئەمما مېنى تۇنجى قېتىم قايسى ئىللىق قۇچاقلارنىڭ باغاشلىغىنى ئېسىمدە يوق ! 

 تۇنجى قېتىم سېنىڭ ئۈچۈن تېلىقىپ تېلىقىپ يىغلىدىم، ئەمما مەن ئۈچۈن كىمدۇ بىراۋنىڭ بىر زامان شۇنداق بوغۇلۇپ يىغلىغانلىقى ئېسىمدە يوق !

تۇنجى قېتىم چېچىمنى سىلىغىنىڭدا ئۆزۈمنى ئەڭ بەختلىك ئىنساندەك ھېس قىلدىم، ئەمما كىملەرنىڭدۇر تالاي قېتىم چاچلىرىمنى سىلاپ ھىدلىغانلىقى ئېسىمدە يوق !

تۇنجى قېتىم بوسۇغاڭدىن ئۇزىتىپ پېشانەمگە سۆيگىنىڭنى ئۇنتالمىدىم، ئەمما بىر بوسۇغىدىن تالاي قېتىملاپ سۆيۈلۈپ ئۇزىتىلغانلىقىم ئېسىمدە يوق !

تۇنجى قېتىم مېنى تاشلاپ كەتكىنىڭدە يۈرىكىمنىڭ قوقاستا پۇچۇلانغاندەك ئېچىشقانلىقىنى سەزدىم ، ئەمما تالاي قېتىملاپ كېتىشلىرىم بىلەن بىراۋلارنىڭ يۈرىكىنى قوقاستا داغلىغانلىرىم ئېسىمدە يوق ! 

 تۇنجى قېتىم جېنىمنى ساڭا بەرمەك ئۈچۈن ئاچچىق ئاغرىقتا ئەلەملىك تولغاندىم ، ئەمما قاچاندۇر بىر چاغدا مەن ئۈچۈن جان بەرمەك بولۇپ كىملەرنىڭ تولغىنىپ بىھوشلانغىنى ئېسىمدە يوق !

تۇنجى قېتىم سېنىڭدىن مۇھەببەت كۈتۈپ تەلمۈرۈپ باقتىم ، مەندىن مېھىر كۈتۈپ تالاي قېتىم تەلمۈرگەن قارچۇقلار ھامان - ئېسىمدە يوق ! 

 ئەسلەنمەيدىغان تالاي ئەسلىمىلىرىمنىڭ كۆلەڭگىلىرى ئىچىدىن ئاستاغىنە سۇغۇرىلىپ چىقىپ قۇلىقىڭغا شىۋىرلىغۇم بار : سېنى سۆيىمەن ! دەپ . - مەھبۇب