كەل نىگارىم يېزىلغان يەرگە

سەيپىدىن ئ‍امۇت

بەرگەن پېتى باقىيلىققا قول،
كەل نىگارىم سۆزلەيلى بىرگە.
ھېچكىم مىكرى سەۋەپ بولمىسۇن،
كەل نىگارىم يېزىلغان يەرگە.

شەرمىڭنى يار ئورا پۇختىلا،
ئازغۇنچى دار كەتسۇن گۈمۈرلۈپ.
تىنىشىڭنى  باشلا باھاردىن،
ئۆلۈۋالسۇن جۇتلار تۈگۈلۈپ.

قاراڭغۇنىڭ لەۋلىرىدىن قال،
دىلىستانىم بەرقىدە ئۈنلە.
كۆڭلۈڭنى بەر كۆڭلۈمگە مەھكەم،
گۈللىرىڭنى ئۇزاتما كۈزگە.

ئىچىڭدىكى ئاتەشۇ ئوتنى،
كۆيدۈرۈۋەر گۈر-گۈر ئوخشۇتۇپ.
كەل نىگارىم يېزىلغان يەرگە،
جەم بولىمىز بىز بىرگە تولۇپ.

2016.21ئىيۇل