ئەپسۇس (شېئىر)

 ئابدۇمىجىت ئىمام غۇلجا

 كۆزۈڭ كۆرگەن چىمەنلەرنى كۆڭلۈڭ كۆرەلمىدى ئەپسۇس.

 بېغىڭدىن ئۆزگە گۈزەللىك ئېۋەن ئۆگەيمىدى ئەپسۇس.

  تىلىڭدا سۆيگۈ داستانى，يولۇڭدا ئاشنا گۈلخانى，

 يۈرەكىڭدە ۋاپا ئاتەش ھەجەپ كۆيەلمىدى ئەپسۇس. 

  سەپەر قىلدىڭ پۇتۇڭ كۆكتە كۈلۈپ يۈردۈڭ پاراغەتتە，

ئاتا-ئاناڭ ھالاۋەتنى تۈزۈك سۈرەلمىدى ئەپسۇس，

پەقەت پۇل ياكى يول بولدى سېنىڭ قولۇڭدىكى دوستلۇق，

گاداي تۇغقان بوسۇغاڭغا شۇڭا ئۈنەلمىدى ئەپسۇس.

  ئابروي تىغىڭنى چاقلاشتا，خوشامەت دىلبىرىڭ بولدى，

دىلىڭنىڭ كۆلىدە پاكلىق راۋان ئۈزەلمىدى ئەپسۇس，

ئۆزۈڭنىڭ خاھىشى بىرلە，قۇلۇپلانغان كۆڭۈل ئىشىكىڭ，

 چۈشەنمەك تەس زەئىپ خۇيۇڭ پەقەت ئۆزگەرمىدى ئەپسۇس.

……2017/1/9