شېئىر ۋە شائىر
ئابدۇرېھىم ئۆتكۈر
شېئىر - مارجان ئەمەس ، يىپقا تىزىپ قويسا تۇرۇۋېردىغان ياكى ماتا ئەمەس ، دۇكان قۇرۇپ توقۇسىلا چىقىۋېرىدىغان .
شېئىر - كەشتە ئەمەس ، رەڭدار يىپ بىلەن لاتىغا تىكىپ قويىدىغان ياكى سۈرەت ئەمەس ، قەغەزگە سىزىپ قويسىلا بولۇۋېرىدىغان .
شېئىر ھەم ھۆسنى ، ھەم پۇرىقى ، ھەم تىكىنى ، ھەم يۇپۇرمىقى بار گۈلگە ئوخشىشىپ كېتىدۇكى ، ھۆسنى بىلەن دىلنى ئۆزىگە مەپتۇن قىلار ؛ پۇرىقى بىلەن جانغا راھەت ۋە ھۇزۇر بەخش ئېتەر ؛ ئىشق ئەھلى ئۇنى قۇلاققا قىسار ياكى گۈلدەستە ياساپ جانانىغا تۇتار ؛ ياۋا توڭگۇز تۇمشۇقىنى تەگكۈزسە ، تىكىنى ئۇنىڭ بۇرنىغا سانجىلار ، ھەتتا بۇرنىنى قانىتار .
شېئىر - ئاسماندىكى يۇلتۇز ئەمەس ، كېچىسى پارقىراپ كۆرۈنگەن بىلەن نە ئىسسىقى ، نە يورۇقى تەگمەيدىغان…
شېئىر - خۇددى بىر مەشئەلدۇركى ، كېچە زۇلمىتىدە ئىنسانغا يول كۆرسەتكۈچى ياكى بىر گۈلخاندۇركى ، پايانسىز دەشتلەرنى يورۇتۇپ ، سوغۇقتىن تىترىگەن تەنلەرگە ئارام بەرگۈچى .
شېئىر - چۆلدىكى ئالۋۇن ئەمەس ، گاھى كۆل ، گاھى دەريا ، گاھى شەھەر ، گاھى گىياھ بولۇپ كۆرۈنگەن بىلەن قوغلاپ يەتكىلى بولمايدىغان .
شېئىر - بىر قاينام بۇلاققا ئوخشىشىدۇكى ، تەشنالارغا ئارام ، دەردمەنلەرگە داۋا ، بىمارلارغا شىپا ، غەمكىنلەرگە شادلىق ، ئاجىزلارغا ئۈمۈد ۋە كۈچ بەخش ئەتكۈچى .
شېئىر - ھاپىزنڭ ناخشىسى ئەمەسكى ، ئاڭلىغانسېرى كىشىنى مۈگدەك باسىدىغان .
شېئىر - گۈلدۈرمامىدۇركى ، ئۇنىڭ ئاۋازى جاھاننى تىترىتىپ ، خامۇش كۆڭۈللەرنى ئويغاتقاي ؛ كىشىنى سەگەك قىلىپ جەڭگە ئۈندىگەي ، ئەبەدىي ھاياتقا چاقىرغاي .!
*****
شائىر - قاغا ئەمەس ، كۆرۈنگەن دەرەخكە قونۇۋېلىپ قاقىلداۋىردىغان .
شائىر - خۇددى تاڭ توخۇسىدۇركى ، كېچىچە تاڭنى چىللاپ تىنماس ؛ تاڭ ئاتقاندا ، ئەلنى ئىشقا ، ھاياتقا ، ئەمگەك ۋە ئىجادقا ئۈندەر . شۇڭا كىشىلەرنىڭ ( ئالتۇن خوراز ) ھەققىدە قىسسە - رىۋايەتلەر توقۇشى ، شەھەر دەرۋازىلىرى بىلەن قەسىر - ئايۋان مۇنارلىرىنىڭ ئۈستىگە ئۇنىڭ ھەيكىلىنى ئورنىتىشى ھەرگىز تاساددىبى ئەمەس ، ھالبۇكى ، جاھان - جاھان بولغاندىن بۇيان ، ھېچكىم تېخى قاغىنىڭ ھەيكىلىنى ئورناتقىنى يوق .
شائىر - تۇتىقۇش ئەمەس ،نېمىنى ئۆگەتسە شۇنى دورايدىغان ياكى ئۆمۈر بويى دوراشتىن بۆلەكنى بىلمەيدىغان .
شائىر -چىن مەنىسى بىلەن بۇلبۇلدۇر . بۇلبۇل ھېچقاچان باشقا قۇشلارنى دورىمايدۇ ، باشقا قۇشلارمۇ بۇلبۇلنى ھەرگىز دورىيالمايدۇ .
چۈنكى ، بۇلبۇلنىڭ ئۆز تىلى ، ئۆز سۆيگۈسى ، ئۆز تەپەككۇرى ۋە ئۆز تۇيغۇسى بار .
شائىر - كىپىنەك ئەمەس ، كۆرۈنگەن گۈلنىڭ ھەممىسىگە پەرقسىز قۇنۇپ ، ھۇزۇر-ھالاۋەت ئېلىشنىلا بىلىدىغان .
شائىر - چىراغ پەرۋانىسىدۇركى ، ھالاك بولۇشنى بىلىپ تۇرۇپ ،ئۆزىنى ئوتقا ئۇرغۇچى …
شائىر - شاھ ۋە سۇلتانلارنىڭ نازۇ نېمەتكە تولغان داستىخانلىرى ئەتراپىدا چۆرگىلەپ يۈرىدىغان ياكى زاھىتلارنىڭ ئېتىكىدە خورۇلداپ ياتىدىغان مۈشۈك ئەمەس… بەلكى پايانسىز دەشتلەردە ئەركىن كېزىپ يۈرىدىغان تەمەسىز ئارسلاندۇركى ، ئۇنىڭ بىر ھۆركىرىشى بىلەن تاغۇ-تاشلار زىلزىلىگە كېلىپ ، تۈلكە - بۆرىلەر ھوشىنى يىغقاي .
( پادىشاھ نىكولاي ئۈستەلگە بىر مۇشت ئۇرغاندا ، پۈتۈن ئوردا ئېچى تىترەپ كېتەتتى ؛ لىف تولستوي ئۈستەلگە بىر ئۇرسا ، پۈتكۈل رۇسىيە زىلزىلىگە كېلەتتى ) دېگەن رىۋايەت مۇبالىغە بولمىسا كېرەك …
چۈنكى لىف تولستوي شېئىر يازمىغان بىلەن چىن شائىر ئىدى .
شائىر پەقەت خەلق بىلەن ، پەقەت خەلق بىلەن شائىردۇر ۋە مەڭگۈ ئۆلمەستۇر .
مەسىلەن : چۇي يۈەن بىلەن ئەلشىر ناۋائىي ؛ لى بەي بىلەن پۇشكىن ؛ بايرۇن بىلەن لۇتپۇللا مۇتەللىپكە ئوخشاش .
ئاپتۇرى : ئابدۇرېھىم ئۆتكۈر
274 قېتىم كۆرۈلدى | 944382894 | ئەسەر يوللىغۇچى : | |
2017-3-10 0:09:19 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|