سۆيگۈ ھىكايىسى
رۇستەم مەخەت
قەلىمىم تەۋرىدى يەنە بىر قېتىم،
ئاڭلاڭلا خالايىق مەندىن رىۋايەت ،
ئاشىقلىق ھۆكمىدىن تۆكەي سىرىمنى ،
مەن شۇنداق ناتىۋان بولدۇم ئاقىۋەت ،
كۆيۈشكە مۇۋەققەت بولدۇم بىر مەھەل ،
شۇنىڭدىن باشلاندى ئۇشبۇ ھىكايەت ،
ئايلاندىم قەپەسكە مەھكۇم بۇلبۇلغا ،
يۈرەكنى چۇلغىدى ئوتلۇق مۇھەببەت ،
چىرايى ئاي ئىدى ئۆزى مۇلايىم ،
بىر قاراپ قويسىمۇ خۇش ئىدىم قەۋەت ،
ئۇلغايدى سېغىنىش رەشىك ئوتلىرى ،
سۆيگۈمنى ئېيتارغا ئىزلىدىم پۇرسەت ،
ئۇيقۇسىز ئۆتكۈزدۈم قەلبىمدە تەشۋىش ،
مەن ئۇنى ئىزلىمەك بولدۇم نەچچە رەت ،
ئاخىرى ياڭرىدى سۆيگۈمدىن سادا ،
ساقلاشقا ھېچ سەۋرىم يەتمىدى پەقەت ،
تىكىلدىم نىگارنىڭ كۆزىگە شۇدەم ،
كۆرگىنىم شۇ بولدى تەشۋىش ھەم ھەسرەت .
چۈشەندىم ھالىنى ئېيتتىم پىچىرلاپ ،
يېنىڭدا ھەمراھ مەن ئەبەدىل ئەبەد ،
چۈشەندى نىگارىم قەلبىمنى ئاخىر ،
قوشۇلدى سۆيگۈلۈك سوقۇپ قوش يۈرەك ،
شۇنداق بىر بىھۇشلۇق قاپلىدى مېنى ،
بۇ بەلكىم ئۆمۈرلۈك بەختتىن دېرەك ،
ياخشى چۈش ئۇزۇنغا داۋام ئەتمىدى ،
ئايرىدى يىراققا رەھىمسىز قىسمەت ،
شۇم ھىجران ئوتلىرى قىينىدى شۇنچە،
چۈشۈمدە كۆرمەككە ئىزلىدىم پۇرسەت ،
ئىنتىلىپ كۈتكەن كۈن كەلدى ئاخىرى ،
ھەر نەپسىم بىلىندى ماڭا سەلتەنەت ،
سۆيگۈلۈك يۈرەكلەر ئۇچراشتى قايتا ،
ئىچىشتۇق ۋىسالنىڭ جامىدىن شەربەت ،
ھېچقاچان ئۈزۈلمەي سۆيگۈ رىشتىمىز ،
ئۆچمىدى دىللاردىن ئۇتلۇق مۇھەببەت ،
نە ئارلىق نە ۋاقت ئايرىپ بولمىدى ،
يۈرەكتە بولغاچقا ۋاپا ساداقەت،
بەلكىم بۇ ھېكايە شۇنچىلىك قىسقا ،
ۋە بەلكىم بىلىندى سىزلەرگە غەلەت ،
سۆيگىدۇر ساداقەت ۋاپا مەكتىپى ،
مەن ئېيتقان ھىكايەت دەل مۇشۇ ھېكمەت ،
2016-يىلى 2-ئاي
187 قېتىم كۆرۈلدى | ئەسەر يوللىغۇچى : | ||
2016-2-22 12:28:47 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|