سۈكۈت
ئەمەرجان ماخسۇت شاھتۈرك

چۆكىسەن سۈكۈتنىڭ چوڭقۇرلۇقىغا،
ئەقىدەڭ ھاياتقا بولغاندا پايخان.
ئازابىڭ ئەپ كەلسە چۈشكە خۇشاللىق،
سۆيگۈنىڭ قەسىمى يالغان ئۇ يالغان.

ھاياتنىڭ كەچمىشى مېسالى كارۋان،
ئۇ شۇنداق يولۇچى سەن ئۇندا ئۆتەڭ.
كۈنۈشنىڭ ئالدىدا كۆيۈش  ھېچنىمە،
سۆيۈلۈش سۆيۈشكە بولالمايدۇ تەڭ.

پۈكۈلۈپ بارىسەن كىرىچكە ئوخشاش،
ئوق بولۇپ سانچىلا قەلبىڭگە ھېجران.
ۋىسالنىڭ قەدىمى يەتمەيدۇ ساڭا،
بەخىتنىڭ بىكىتى يوقالغان تامام.

ياشايسەن ئەڭ قېيىن مېنۇتلار ئارا،
كۈلكەڭمۇ يىغىدەك ئاڭلىنار مۇڭلۇق.
ئارمانلار ئىچىدە ياشايسەن شۇنداق،
ھەسرەتنىڭ چۈلىدە ئېچىلار چوغلۇق.

2016.12.27 كېچە يۇرتى قاراقاش