شاگىرتىمنىڭ شېئىرى
ئانا بولۇش -پەخرىمدۇر مېنىڭ
مەريەم ئېزىز تامچە
ئانا بولۇش -پەخرىمدۇر مېنىڭ ،
ۋۇجۇدۇمنى كېزەر سۆيۈنۈش .
دىلىمغا يار ئائىلىگە ھەم ،
پەرزەنتىمگە ئوتلۇق كۆيۈنۈش .
ئانا دېگەن جەزىبىدار نام ،
بارچە تىلدا ئەيلىنىدۇ ياد .
جەمئىيەتنىڭ گۈلتاجى ئانا ،
تاپماس روناق ئانىسىز ھايات .
ئانا دېگەن گۈللەر رەناسى ،
جان يايرىتار چېچىپ مۇئەتتەر .
ئۇنىڭ قەلبى مېھىر دەرياسى ،
تۇيغۇلارنى تاتلىق تەۋرىتەر .
ئائىلىنىڭ نۇرلۇق چىرىغى ،
جۆرىسىگە ھەردەم غەمگۈزار .
بارلىغىنى ئاتار مىننەتسىز ،
بالىلارغا بولۇپ پىداكار .
ئىش -ئەمگەكتە ھارماس ئىنساندۇر ،
بار تەڭداشسىز شىجائەت ، سۇبات .
خىيالىدا بىر ئۆينىڭ غېمى ،
بىل :شەخسىيەت ۋىجدانىغا يات .
ھەر ساھەدە تۆھپىكاردۇر ئۇ ،
ئەركەكلەردىن ئەسلا قېلىشماس .
شۇنچە يۈكسەك شۇڭا تەرىپى ،
"يېرىم دۇنيا "- خىسلىتىگە ماس .
ئىللىق باغرى چاچار ھارارەت ،
ئاتا ئەيلەپ بېھىش ھۇزۇرى .
بىر جەمەتكە تالىق ئەمەستۇر ،
بەلكى پۈتۈن مىللەت غۇرۇرى .
شەرەپ ماڭا ئانا بولماقلىق ،
بۇ تەڭداشىز بەختىم ،ئامىتىم .
روخسارىمدا مىسلىسىز شادلىق ،
تاغلار كەبى مەغرۇر قامىتىم .
شەرمى -ھايا ،ئەخلاق بىباھا ،
روھىيتىم بۇ خىسلەتكە يار .
ئائىلىدە تەلەپچان ئۇستاز ،
ئۇدۇم ئېلىپ ئەۋلات تاۋلىنار ،
ئانا بولۇش -پەخرىمدۇر مېنىڭ ،
شۇنچە يۈكسەك قەدىر -قىممىتىم .
ئۆز بۇرچىمنى قىلىمەن ئادا ،
چىن ساداقەت ئۆڭمەس زىننىتىم .
ئاپتور :ئۈرۈمچى شەھىرى تەڭگەتاغ سودا سارىي 2-قەۋەت 25-دۇكاندا
2017.1.16
5042 قېتىم كۆرۈلدى | xeydayi | ئەسەر يوللىغۇچى : | |
2017-3-15 0:47:33 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|