ئۆكسىمەيدۇ ھەرئان سېغىنىش
(ئانامنى ئەسلەپ )
تۇرسۇن ئىمىن شەيدائى
شىنجاڭ يازغۇچىلار جەمئىيىتىنىڭ ئەزاسى
ياش تۆكەركەن ئايەم كەلگەندە ،
ئاتىسزلار قىينىغاچ پىغان .
ئانىسىزلار مىسلىسىز غەمدە ،
تار كەلگەندەك پايانسىز جاھان .
بىلسەڭ مەنمۇ ئوخشاشلا يېتىم ،
تۇيغۇ نىمجان -ئېزەر تېۋىنىش .
تەرتىپسىزدۇر يۈرەكتە رېتىم ،
ئۆكسىمەيدۇ ھەردەم سېغىنىش .
ئۆسمۈرلۈكتە ئاتىسىز قالدىم ،
كەتتى غۇلاپ يۆلەنگەن تېغىم .
بۇرچىنى ئۆز زىممەمگە ئالدىم ،
ھېچ ئارامسىز ئىشلەپ بىتىنىم .
ئاجىز ئانام ،بەش بىر تۇققىنىم ،
ئالدى تۆرگە پاناھىمىز دەپ .
كەتمەن ،ساپان بولدى تۇتقىنىم ،
خامانلاردا قالدىم كۆپ تۈنەپ .
ئۆرلەپ ئوقۇش ئوتلۇق ئىستىگىم ،
ئاھ ،بىر چۈشكە ئايلاندى نىتەي ؟
ھاياتىمدا ئازاپلىق رېتىم ،
بەختىم بېشى قېيىپ قىلدى قەي .
ئىنقىلاپمۇ 1@ ئاشقاچقا چەكتىن ،
ئىسكەنجىگە ئالدى جاھاننى .
ئېلىم -سېتىم چەكلەندى كەسكىن ،
مۇدھىش تۇمان باستى ھەر ياننى .
تۇخۇم ساتساڭ ئېغىر جىنايەت ،
( يۈزلىنەتتى ئۆلمەي قىيامەت .)
كۈن -تۈن ئىشلەپ چەكسەڭ رىيازەت ،
تەگمەس ئىدى قولغا دارامەت.
ئانام يىغلاپ باغرىغا باسقان ،
ئەزگىنىدە ئېتىز مېھنىتى .
كۆڭلى -كۆكسى كائىناتسىمان ،
بىباھاكەن مېھرى ،ھىممىتى .
ياشلىغىدا ئىدى تۇلۇن ئاي ،
ئەۋلات ئۈچۈن بولغان ئىدى قۇل .
ئۆگەيلىكنىڭ دەردىن تارتقۇزماي ،
ئوتتۇز يىلنى ئۆتكۈزگەنتى تۇل .
تۆلەيدۇ كىم بۇنداق زور بەدەل ،
باھارىنى ئەيلىشىپ خازان ؟!
ئانىلارنىڭ شەپقىتى ئەۋزەل ،
ئايىغىدا تىزلىنار خاقان !
قىلدى ھەتتەڭ باقىيغا سەپەر ،
كۆرسىتەلمەي بىزلەر ھېچ راھەت .
پۇچىلىنار قەلبىم شۇ قەدەر ،
بۇرچ ئادا ئەتمىگەن ھالەت .
چاقنار ئىدى چېھرىدە قۇياش ،
كۆزلىرىدە مېھىر زىياسى .
تەڭدىشى يوق غەمگۈزار قاياش ،
قىيامەتتۇر ئۇنىڭ قازاسى .....
ئاچتى قۇچاق ئىسلاھات دەۋرى ،
كەڭ يول ئاچتى دانا سىياسەت ،
ئۇلۇغلاندى ئەل -ئاۋام قەدرى ،
تەرەققىيات بەرگەچ كاپالەت .
ئوڭشالغاچقا سوللۇق كېسىلى 2@،
قوۋناق تۇرمۇش ئاچتى خۇشچىراي .
توققۇزىم تەل - مۇھتاجلىق نېرى ،
يۈتتۈم ئازاپ بىلسەڭ بىر تالاي .
ئۇنىڭ مېھرى ئەزىم دەرياكەن ،
يايرىغاي جان ھەردەم يۆلەنسەڭ .
باغرى ئىللىق كەڭرى دۇنياكەن ،
سۆيگۈسىگە ھەردەم بۆلەنسەڭ .
تار كەلمەكتە ياسىداق ساراي ،
قۇرۇق قەغەز ھەمياندىكى پۇل .
مۇسىبەتتە روھىم زەپ گاداي ،
ئېتەلمىدىم بۇ ھالنى قۇبۇل ...
بولغىنىمدا مەنمۇ بالىلىق ،
ئانام قەدرى ئۆتۈلدى راسا .
ئىنساندا كۆپ ئىكەن چالىلىق ،
پۇشايمانغا يوق قاچا ،ئەسلا !
ئەزىز ئانام بولسىدى ھايات ،
پاراغەتنى بىرلىكتە سۈرسە .
قۇت -بەخىتتىن دىلى كۈلۈپ شاد ،
نەۋرىلەرنىڭ مەڭزىگەسۆيسە .
كەتتى نىتەي كەلمەس سەپەرگە ،
يۈرىكىمنى ئېتىپ مىڭ پارە .
كۆمۈلگەندە ئاھ ،قارا يەرگە ،
تېپىلماسكەن دىدارغا چارە .
خىيالىمدا نۇرلۇق ئوبرازى ،
يېگەن ئېشىم سىڭمايدۇ ئەسلا .
ھاياتلىقتا قىلالماي رازى ،
نادامىتىم ئاتىدۇ پەشۋا .
شۇ سەۋەپلىك قىينار مۇسىبەت ،
ھېسلىرىمنى كىشەنلەپ پىغان .
پىراق ئوتى ئۆرتەيدۇ قەۋەت ،
روھىم سۇلغۇن ،ۋۇجۇدۇم نىمجان .
ھەسرەت بۇتاپ يەتتى چەككىچە ،
ھەر تىنىققا سېغىنىشلار جەم .
بۇ ھال ئادەت ئەجەل يەتكىچە ،
غەگۈزار سىز كۈنلىرىم ماتەم !
1@ ئىنقىلاپ -ئاتالمىش "مەدەنىيەت زور ئىنقىلاۋى" دەۋرىنى كۆرسىتىدۇ .
2@ سوللۇق كېسىلى -ئەينى دەۋىردىكى سولچىل خاتا لۇشيەننى كۆرسىتىدۇ .
ئاپتور : بورتالا شەھەرلىك رادىئو -تېلىۋىزىيە ئىستانسىسىدىن
2017.3.20
2655 قېتىم كۆرۈلدى | xeydayi | ئەسەر يوللىغۇچى : | |
2017-3-25 18:09:16 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|