ئەللەي ناخشىسى

مېھىرنىسا قۇربان

جان ئانامنىڭ ئەللەي ناخشىسى،
ئاڭلىنىدۇ ھەجەپ يېقىملىق.
جاراڭلايدۇ قۇلاق تۈۋىمدە،
مۇزىكىسىز شۇنچە رېتىملىق.

ئەللەي ئېيتىپ بەرگەندە ئانام،
كېتەتتىمغۇ تاتلىق ئۇيقۇغا،
غەمسىزلىكتە چۈشلەرنى كۆرۈپ،
چۆمۈلەتتىم شېرىن  تۇيغۇغا.

ئانام ئېيتقان ئەللەي ناخشىنى،
قانماي كەلدىم قانچە ئاڭلىسام.
بولسا پۇرسەت ماڭا قايتىدىن،
بالىلىققا يەنە قايىتسام.

ئەللەي بالام ئەللەي دىگەندە،
گىرە سالغان ئانام بوينىغا.
ھىدلىرىنى پۇراپ قانمايتتىم،
سېڭىپ كەتكەن ئىللىق قوينىغا.

مەنمۇ ئېيتتىم ئەللەي ناخشىسى،
چوڭ قىلغۇچە ئوماق بالامنى،
ئەسلەپ ئۆتتۈم سېغىنىش بىلەن،
ئەللەيلىگەن ئەزىز ئانامنى.

ئانا ئېيتقان ئەللەي ناخشىسى،
ناخشلارنىڭ ئىسىل ياخشىسى.
قانمىغاندۇ ئەللەي ناخشىغا،
ماڭا ئوخشاش يەنە قانچىسى؟؟؟

2016-12-13 غۇلجا شەھىرى