رۇبائىيلار
تاھىر مۇھەممەد مەشئەلى

بىر  دوستۇم سورىدى نىشانىڭ نېمە،
دۇنيادا ياشاشقا سەۋەبىڭ  نېمە.
مەن دېدىم ئەلۋەتەن رازى بولسىلا،
ئەي دوستۇم باشقىغا سەن بەك غەم يېمە.

ئىنساننىڭ بەختلىك جەننىتى  ۋەتەن.
ھاياتنىڭ ئەڭ شېرىن لەززىتى ۋەتەن.
مەرد يىگىت غورۇرى ئىپتىخارى ئۇ،
شۇنداقلا ئۇنىڭكى ئىززىتى ۋەتەن.

سامادا ئۇچسام گەر قانىتىم ۋەتەن.
شۆھرىتى ئالەمچە قامىتىم ۋەتەن.
شادلىقىم شۇنداقلا راھىتىم ۋەتەن.
مىسلىسىز بايلىقىم ئامىتىم ۋەتەن.

مەرد يىگىت ئۆلىدۇ ئاران بىر  قېتىم.
نامەردلەر ئۆلىدۇ كۈندەمىڭ قېتىم.
مەرد يىگىت ئۆلسىمۇ يادلىنار نامى،
نامەردلەر ھاياتۇ  ۋە لېكىن يېتىم.

يىقىلسا ئوغلۇڭنى يۆلىمە ھەرگىز.
يىقىلغان ئورنىدىن ئۆزى تۇرسۇن تېز.
چېنىقسۇن يىقىلىپ گاھى سوقۇلۇپ،
مەڭگۈلۈك يۆلەنچۈك بولالمايمىز بىز.

ئاپتور غۇلجا شەھەر بايانداي بازىرىدىن