ئانا ! مېنى تۇققان كۈنىڭگە مۇبارەك بولسۇن !!!

ئابدۇقەييۇمجان ئابدۇسادىرى

نەسىر

ئۆزۈمنىڭ  بۈگۈنكى تۇغۇلغان كۈنىمگە ئاتاپ

يىگىرمە نەچچە يىل ئىلگىركى بۈگۈنكى كۈندە ، يىراق سەھرادىكى شۇ جەننەت ماكان ئۆيۈمدە مىھرىبان ئانام پىغانلىق تولغاق ئازابى بىلەن ئەزرائىل بىلەن نەچچە مىڭ مەرتىۋە ئىلىشىپ مېنى بۇ دۇنياغا ئاپىرىدە قىلغان ئىكەن . شۇكۈندىكى ھايات – مامات چىگرىسىدىكى ئانام شۇنچە قىيناشلارغا بەرداشلىق بىرىپ مەندەك بىر نارسىدىنى بۇ دۇنياغا ئىلىپ كەلگەن ئىدى .باشقىلادىن ئاڭلىسام تۇغۇت ئالدىدىكى تولغاق ئازابىغا ھىچنەرسە توغرا كەلمەيدىكەن .

  مانا ، يىگىرمە نەچچە يىل ئۆتۈپ كەتتى . يىگىرمە نەچچە يىل ئىلگىركى مۇشۇ كۈندە بىچارە ئانام نەچچە كۈنلۈك ئاغرىق ئازابىنى باشتىن كەچۈرگەن بولغىيتتى ؟ بۇنىسى ماڭا نامەلۇم ، لېكىن شۇ كۈدىن ، ئانام مېنى بۇ دۇنياغا تەئەللۇد قىلغاندىن باشلاپ مىھرىبان ئانامغا مىڭ مەرتىۋە رەھمەتلەرنى ئىيتىپ  ياشاپ كىلىۋاتقىنىمنى بىلىمەن. شۇكۈندىن باشلاپ بىچارە ئانام بارلىقىنى ماڭا تەقدىم قىلدى ، ھەربىر تىنىقلىرىدا مېنى ئويلىدى ، مەن سەۋەپلىك تالاي كېچىلەرنى كىرپىك قاقماي تاڭغا ئۇلىدى . ئۆزى يىمەي يىگۈزدى ،ئۆزى كىيمەي كىيگۈزدى . ئەڭ مۇھىمى ئانام تاھازىرغىچە ماڭا ھەم ئانا ، ھەم دادا بولدى . شۇ سەۋەپ باشقىلار دادىسىدىن ئىرىشكەن ھەرقانداق مىھىرنى مەن ئانامدىن ئىرىشتىم، يەنە شۇ مىھرىبان ئانامدىن ئىزدەشكە مەجبۇر ئىدىم .

ئانام بۇلغاچقا ، كىچىك چاغلىرىم شۇنچە مەنىلىك ئۆتكەن ئىدى . گەرچە بىزنىڭ ئۆي شۇنچە نامرات بولسىمۇ ،لېكىن  ئانام ماڭا يوقسىزلىقنىڭ سىماسىنى كۆرسىتىش ئەمەس ، شولىسىنىمۇ يىقىن يولاتمىغان ئىدى . ئانام بولغاچقا مەن شۇنچىلىك بەختىيار ئىدىمكى، ھەرقانداق ئاتالمىش كۈندە زىياپەتلەردىن كېلەلمەي ، ئىسىل نازۇ – نىمەتلەرنى بولىشىغا يەپ ، كىچە خۇرۇلداپ خورەك تارتىپ ئۇخلايدىغان شۇ « ئىسىلزادىلەر » نىڭ بالىلىرىدىن نەچچە ھەسسە بەخىتلىك ھىس قىلاتتىم .

ھلىمۇ ئىسىمدە ، كىچىك ۋاقىتلىرىمنىڭ بىر كۈنى  مىھرىبان ئانام مېنى ئۇخلىتىپ قويۇپ ھويلىمىزدا ئاي يورىقىدا ئالدىغا بىر دۆۋە ئۈرۈك ئۆچكىللىرىنى تۆكۈپ قويۇپ، چىقىپ مىغىزنى شاكىلىدىن ئايرىۋاتقان ئىكەن . ئانامنىڭ مىھرىنى بەدىنىمگە ئوراپتۇرغان ئىسسىق يوتقۇنۇمنىڭ ئىچىلىپ كەتكىنىدىن ئويغىنىپ كەتتىم ،ئانامنىڭ يىنىغا باردىم:

ئانا ،بۇكىچىدە ئۇخلىماي نىمە قىلۋاتىسەن ؟ ئانام مېنى كۆرۈپ بىرئاز جىمجىت تۇرۇپ ئويلىنىۋالغاندەك بولۇپ

-      ھە ..! ۋاي بالام ، ئەتە سېنىڭ تۇغۇلغان كۈنىڭ ، قارىسام يىنىمدا تۈزۈك پۇل يوق ، بوۋاڭدىن سوراي دىسەم تىخى ، شۇڭا بۇ بىرقانچە كۈندىكى تەرگەن مىغىزلىرىمنى چىقىپ ئەتە ساڭا كىيىم ئىپ بىرەي دىگەن، دىگەن ئىدى  . مەن ئۇ ۋاقىتلاردا كىچىك بولغاچقىمۇ ئانچە ئىرەڭشىمەيلا 

-      ئۇنى ئەتە قىلە ، سەن بولمىساڭ قورقىدىكەنمەن ئانا ، يۈرە ئۇخلايلى . دىيىشىمگە ئانام:

-      ئازلا قالدى ئوغلۇم ، سەن كىرگەچ تۇرغىن ، مەن ئارقاڭدىن كىرەي ، دەپ مېنى كىرگۈۋەتكەن ئىدى . مەن بۇ ئۇيقۇچىلىقتا گەپمۇ قىلماي كىرىپ كەتكەن ئىدىم .

 ئەتىسى ، يەنى مېنىڭ تۇغۇلغان كۈنۈم ،  ئانام سەھەردىلا مېنى ئويغۇتۇپ پىشانەمگە مىھرى بىلەن سۆيۈپ تۇرۇپ :

-  بالام ، تۇغۇلغان كۈنىڭگە مۇبارەك بولسۇن ! يۈرە بىز بازارغا كىرىپ چىقايلى . دەپ مېنى ئىلىپ ماڭدى . شۇ ۋاقىتلاردا ئانامنىڭ كىچىكىنە بىر ۋىلىسپىتى بولىدىغان ، بىچارە ئانام ۋىلىسپىتىنىڭ ئارقىغا كىچىچە كىرپىك قاقماي شاكىلىدىن ئايرىپ چىققان بىرخالتا مىغىزنى قويدى ۋە ئۆزى ئولتۇرىدىغان يىرىگە مېنى ئولتۇرغۇزۇپ ، ئۆزى پىيادە ھالدا نەچچە كىلومىتىر يىراقلىقتىكى ناھىيە بازىرىغا ئىلىپ كىرگەن ئىدى . مەن يولدا ئانامنىڭ ۋىلىسپىتنىڭ روللىرىنى تۇتقان ، ئورۇقىنە قوللىرىغغا قارىسام ئانام بىر قولىنىڭ ئوتتۇرا بارمىقىنى لاتا بىلەن ئوراپ قويغان ئىكەن .  سىنچىلاپ قارىسام بارمىقىنى تاڭغان لاتىنىڭ گىرۋەكلىرىدىن قان تامچىلىرى ئىقىۋاتاتتى .

-  ئانا ، قولۇڭغا نىمە بولدى ؟ قان ئىقىۋاتىدىغۇ ؟ ، دەپ سورىسام ئۇ قولىغا قارىۋىتىپ سوغۇققىنە كۈلۈپ قويدى دە:

-  ھىچقىسى يوق بالام ، كىچە ئۇيقىچىلىقتا مىغىز چاقىدىغان تاشنى قولىمغا ئۇرىۋالغان ئىدىم ، بايا لاتا بىلەن تىڭىپ قويدۇم ھىلىلا توختاپ قالىدۇ . دەپ يولنى داۋام قىل ۈدى. مەنمۇ يىشىمنىڭ كىچىكلىكىدىنمۇ ، ياكى ئەقىلسىزلىقىمدىنمۇ ئانچە ئىرەڭشىمەپتىمەن . شۇ كۈنى بىز بازارغا كېرىپ مىغىزنى ساتتۇق دە ، ئانام ماڭا يىڭى بىرقۇر كىيىم ، ئويۇنچۇق ، يەنە تىخى كاۋاپ ، لەغمەنلەرنى ، ئىشقىلىپ مەن ياختۇرىدىغان ئويۇنچۇقلارنى يىمەكلىكلەرنى  ئىلىپ بەردى ... بۇ مەن ئەقلىمنى بىلىپ ئانامنىڭ تۇغۇلغان كۈنۈمگە بەرگەن تۇنجى ۋە ئاخىرقى سوغىتى ئىدى .

  ئۇزۇن ئۆتمەي كاج تەقدىر بىزنى ، ئانا – بالا ئىككىمىزنى ئايرىدى . بۇ سەككىز ياش ۋاقىتلىرىم ئىدى . بۇ كۈنى ئانام قايتا توي قىلدى ، بۇ ۋاقىتتىمۇ مىھرىبان ئانام مېنىڭ باشقىلار ئالدىدا قىسىلىپ قىلىشىمدىن ئەنسىرەپ مېنى رەھمەتلىك بوۋام – موماملارنىڭ يىنىدا قالدۇرغان ئىدى . مانا شۇ ۋاقىتتىن باشلاپ ئانام ئىككىمىز ئايرىلىپ ياشىدۇق . شۇ كۈندىن باشلاپ ، مەن سائەت ، كۈنلەرنى ساناش بىلەن  ئاۋارە ئىدىم ، چۈنكى شۇ ۋاقىتتىن باشلاپ ئانام بىلەن ھەپتىدە ئارانبىر قىتىم كۆرىشەتتۇق .

  شۇنداق سەۋەپلەر تۈپەيلىدىن مەن تا بۈگۈنگىچە شۇ بىر قىتىم تۇغۇلغان كۈنىمنى ئۆتكۈزۈپ باقىنىم ، ئانامنىڭ « بالام ،  بۈگۈنكى تۇغۇلغان كۈنىڭگە مۇبارەك بولسۇن » دىگەن شۇ كاتتا سوغاتنىلا ئالغىنىم ئىسىمدە .....

 بۈگۈن تۇغۇلغان كۈنۈم . مەن بۇ كۈندە باشقىلارغا ئوخشاش ھەشەمەت بىلەن داغدۇغا قىلىشنى ياقتۇرمايمەن ، ھەشەمەت سورۇنلاردا تورت – پۇشۇرۇقلار بىلەن ئىغىزلىرىمنى مايلاشنى تىخىمۇ خالىمايمەن . بۇنداق دىسەم بەزىلەر كۈلىشى مومكېن ، لېكىن مەن ماڭا كەلگەن شۇ يىگىرمە نەچچە قىتىملىق تۇغۇلغان كۈنىمنى پەقەت شۇ بىر قىتىملا ئۆتكۈزدۈم .

مانا ، بۈگۈنمۇ مېنىڭ تۇغۇلغان كۈنۈم . توغرىسىنى ئىيتقاندا بۈگۈن مېنىڭ ئانامنىڭ مېنى تۇققان كۈنى .... ئانا ! مېنى تۇققان كۈنىڭگە مۇبارەك بولسۇن ئانا !

تاڭنىڭ سەھەردىكى سەلكىن شامالىرى بىلەن قوشۇلۇپ نۇرغۇنلىغان، دوسلۇرۇمنىڭ « تۇغۇلغان كۈنىڭىزگە مۇبارەك بولسۇن ، بەخىتلىك بولۇڭ ، خۇشالىق سىزگە يار بولسۇن ...» دىگەندەك بىرقاتار تەبرىىك سۆزلىرى ، تىلفۇنلىرىنى تاپشۇرۋالدىم لېكىن بۇلارغا ئانچە خۇشال بولمىدىم ، لېكىن شۇ ئۇچۇرلار ئارىسىدىكى بىرقىسىم قىرىنداشلىرىمنىڭ « قىرىندىشىم ، ئانىڭىزنىڭ سىزنى تۇققان كۈنىگە مۇبارەك بولسۇن ... » دىگەن ئۇچۇرلىرىنى كۆرۈپ ئىختىيارسىز يىغلاپ تاشلىدىم دە ، ئۇلارغا كۆپلەپ رەھمەت ئيتتىم . راس ئانا ، بۈگۈن مېنىڭ تۇغۇلغان كۈنىملا ئەمەس ، بەلكى يىگىرمە نەچچە يىل ئىلگىرى سەندەك بىر پەرى بۈزىرۈك ئانامنىڭ مېنى تۇققان  كۈنىڭنىڭ يالدامىسى . ئانا ! مىھرىبان ئانا ، مېنى تۇققان كۈنىڭگە مۇبارەك بولسۇن  ئانا !!!

بىلەمسەن ئانا ، ھەر يىلى بۈگۈندە مەن سېنى ئويلايمەن . كۆز ئالدىمدا تولغاق ئازابىدا مېنى دۇنياغا كۆز ئاچتۇرغان، سەن زاھىر بولىسەن ئانا ! شۇ ۋاقىتتىكى ئاغرىق ئازابىدا ئىڭراشلىرىڭ ، ھايات – مامات ئارلىقىدا جان تالىشىشلىرىڭنى ئويلسام يۈرۈكۈم پۇچۇلنىپ كېىدۇ ئانا . بۈگۈنكى مەن تاپشۇرۋالغان تۇغۇلغان كۈنىمگە ئاتالغان بارلىق قەسىدىلەر پەقەت ساڭىلا تالىق ئانا ! گەرچە مەن بۈگۈن مۇساپىرچىلىق بىلەن يات شەھەردە تۇرۋاتقان بولساممۇ لېكىن ، شۇ مىنۇتلارنى ، سېنىڭ تۇنجى قىتىم ئۆتكۈزۈپ بەرگەن  شۇ تۇغۇلغان كۈنىمنى مەڭگۈ ئۇنىتمايمەن ئانا ، جىنىم ئانا ! بۈگۈنكى مېنىڭ تۇغۇلغان كۈنىمگە ئەمەس ، مېنى تۇققان كۈنىڭگە مۇبارەك بولسۇن !!!

تۇغۇلغان كۈنۈمگە

ئابدۇقەييۇمجان ( ئەختەر )

قۇتلۇق بۈگۈن تۇغۇلغان كۈنۇم،

بەخىت ئەلگە مەندىن تارالسۇن.

گۈللەرئۈنەرباسقان ئىزىمدىن ،

ئوتلۇق ھايات قىممەت ياراتسۇن.

مېھىرلەرگە قانمايلا ئۆتكەن ،

مەندەك ئۆتمىسۇن ھىچكىمنىڭ كۈنى .

كۆڭلۈم گەرچە سۇنۇق بولسىمۇ ،

ياڭراتماسمەن پىغانلىق ئۈنى .

شۇ غەيرەت كېرەك مىسكىنلەرگە ،

مېھىر بەرمەس چۈنكى جىمىي جاي .

ئاڭسىز تۇرۇپ باللىرىنى باققان،

شۇ ھايۋانلارمىھىرلەرگە باي .

ئەتە بىلەن باشلىنار بەختىم ،

ياكى قايغۇ مۇسىبەتلىرىم .

كۈتۈپ تۇرار گاھ، ئامەت مېنى

چۈنكى بۈگۈن تۇغۇلغان كۈنۇم !

ئازاپلاردا تىنىم تىتىلىپ ،

ئۆتتى مېنىڭ شۇنچە كۈنلۈرۈم

گاھ ، زورىغا تەبەسسۇم قىلىپ

ئاھ ، ئەجەپمۇ قىنالدى جىنىم .

تەڭرى سەۋەپ تۇغۇلغۇنىمغا ،

مەنمۇ بىلدىم ھەممە ئادەم دەپ.

شۈكرى ھەمدە مۇشۇ كۈنلىرىم،

قىنى دۇنيا ھايات ئادەم دەپ .

بۈگۈن مېنىڭ تۇغۇلغان كۈنۈم،

ھەممە ئانا سېنىڭ بەرگىنىڭ .

رەھمەت ساڭا ئەزىز تەڭرىم ھەم ،

يۈكسەكلەرنى ئۇچراشتۇرغىنىڭ .

رەھمەت ئاكا ماڭا نان بەرگەن ،

دىلىم بىلىپ شۇنىلا دەيدۇ .

قايتۇرالماي كەتسەم بىئەجەل ،

يۈرەكئىچىدە  قانلار چاچرايدۇ .

بۈگۈن مېنىڭ تۇغۇلغان كۈنۇم،

مېھىرلەرگە سالاملار بولسۇن .

مېھىرلىك ھەممە سىخى قوللارنى ،

ھەر بىر يەردە ئەزىزلەر قىلسۇن !!!

ئۈندىدار : 2041420589

2017-يىلى 6-ئاينىڭ 23- كۈنى ، ئۈرۈمچى

بۈگۈن ئانامنىڭ مىنى تۇققان كۈنى ، شۇ مۇناسىۋەت بىلەن تىنىقىم باشلانغاندىن باشلاپ ھازىرغىچە ماڭا ھەم دادا - ھەم ئانا بولۇپ كىلۋاتقان پەرىشتە سۈپەت ئانامغا رەھمەت ئىيتىش يۈززىستىن بۇ ئەسەرنى يىزىپ چىقتىم بارلىق ئوقۇرمەنلىرىمنىڭ مەن باشقۇرۋاتقان يازغۇچىلار تورى ، ياش قەلەم تورى ۋە ئۈندىدارىم ئارقىلىق ئەسىرىمگە باھا بىرىشىنى قارشى ئالىمەن . 

ئابدۇقەييۇمجان ( ئەختەر ) 

ئۈندىدار : 2041420589 
     

مۇھەرىر : ئابدۇقەييۇمجان ئابدۇسادىرى

ئۈندىدار  : 2042420589

ئەسكەرتىش : ئەسەرلەرنى تورىمىز ۋە ئاپتۇرنىڭ ماقۇلىقىنى ئالماي ھەر قانداق مەدبۇئات ئورۇنلىرى ، توربەت ، سالۇنلارنىڭ خالىغانچە تارقىتىشىغا يول قويۇلمايدۇ . ئەگەر شۇنداق ئەھۋاللار بايقالسا بارلىق ئاقىۋەتكە تارقاتقۇچى تەرەپ مەسئۇل بولىدۇ !!