قار لەيلىسى

ئەخمەتجان سېيىت

قارلەيلىسى ، قارلىق لەيلىسى،

 قارپەرىسى قارنىڭ گۈلىسەن.

 قاردەك ئاقلىق ساڭا بەخشەندە،

قارنىڭ ئىزى قارنىڭ قىزىسەن.

 ئاپئاق دالا سىنىڭ ۋەتىنىڭ،

 قار ئىلكىدە پاكلىنىپ ياتقان.

 ھاۋا ئانا چۈشكەندە كۆكتىن،

 ئەڭ ئاۋۋال سىنى ئۇچراتقان.

 زەيتۇن چىشلەپ كەلگەن كەپتەرنىڭ،

 لەۋلىرىدە سىنىڭ بەرگىڭ بار.

 پاك ياشىغان ئادەم ئىزىدا،

 سىنىڭ جىلۋەڭ سىنىڭ ھىدىڭ بار.

 پاك ئىزلاردىن پاك ئەگىزلەردىن،

 قارلەيلىسى چىقىدۇ ئۈنۈپ.

 پاك قىرلاردىن پاك قىيالاردىن،

سالام قىلار گۈلدەستە سۇنۇپ.