كۆرۈشمىسەك  بوپتىكەن ئەسلى
تۇرسۇن ئىمىن شەيدائى
( شىنجاڭ يازغۇچىلار جەمئىيىتىنىڭ ئەزاسى )

ئويلىمىغان  ئىلگىرى  زىنھار ،
قويۇشۇڭنى بۇنچە  ھەيرەتتە .
چېھرىڭ نۇرلۇق ،كۆزلىرىڭ خۇمار ،
بارچە تەنناز  قالۇر  ھەسرەتتە .

گۈل جامالىڭ  ئەقلىم ئېتىپ لال ، 
نىگاھىمنى ئەيلىدىڭ بىھۇش  .
تۇيغۇلاردا ئەجەپ  غەيرى ھال ،
ئارام بەرمەس دولقۇن -داۋالغۇش .

شېرىنلىگى ئىشىقنىڭ بۇ تاپ ،
تىنىغىمدا  ئەيلىنەر بايان  .
چىن سۆيۈلۈش ئىستىگى قىيناپ ،
ھارارىتى بولۇر نامايان .

مېھرىڭ سېنىڭ  ئوتلۇق نىمانچە ،
قەلىبلەرنى ئېتەركەن قامال .
بەرسەڭ ئىدىڭ سۆيگۈدىن تامچە ،
تاپار ئىدى ئارمىنىم  ۋىسال  .

كۆرۈشكەندە قۇت پەيزى سۈردۈم ،
بولغىنىدەك كاتتا ھېيىت -بايرام .
تىرىك دۇزاق ئازاۋى كۆردۈم ،
ئايرىلىشقا بېرەلمەي چىدام .

ئاققۇ كەبى پەر قېقىپ ئۇچۇپ ،
كۆز ئالدىمدىن كەتتىڭ يىراقلاپ .
دىل خانەمدىن بىر سادا ئوخچۇپ ،
قويدى  مېنى كەسكىن سوراقلاپ  :

-كۆيگىنىم  راست ،ئەتمەي ئاشكارە ،
يەنە  نىچۈن بولىسەن خىجىل   ؟
بەردىم جاۋاپ :
                -مەندە نە چارە ،
تەمتىرەشتە كېكەچلىسە  تىل !؟ ...

 خىيالىمدا   سەن كۆككە چىقىپ  ،
ئايلانغاچقا    ماھى ھىلالغا  .
تىپىرلىدىم   دېمىم  سىقىلىپ ،    
غېرىپ كۆڭلۈم    قالدى ئۇۋالغا .

"كۆزگە يېقىن ،كۆڭۈلدىن يىراق " -
دېگەندەكلا تۇتالمىدىم قول .
ئۇچراشساقمۇ ،مىڭ ئەپسۇس  بىراق -
سالالمىدىم يۈرىكىڭگە يول .

ئۆتتى ھەر كۈن گويا يىل كەبى ،
تەلمۈرگەنچە   كۆزۈمنى ياشلاپ .
شەيدالىغىم  بۇدەم ئەسەبى  ،
كەتتى بىلسەڭ جېنىم  زەپ  قاخشاپ .

كوچىسىنى   بىر رەت   كۆرمەستىن ،
سۆيگۈ كۈيلەپ يازدىم كۆپ ئەشئار .
" مەجنۇن " دەيتتى خەخلەر بىلمەستىن ،
بولمىسماممۇ  بۇنداق  ھالغا   يار .

ئۇزۇلمەس قىپ  رېشتىم باغلىدىڭ ،
نېتەي ، ئۆزۈڭ  سەزمىدىڭ ئەسلا ؟
ئوتقا  تاشلاپ  باغرىم داغلىدىڭ ،
ئۆرتىنىشتىن كۈل قىلدىڭ راستلا .

 تالجىقماقتا روھىم   دىلرابا   ،
تىلەپ سەندىن  سۇنۇشنى  زەمزەم  .
يۈرىكىممۇ  چەكمەكتە  نىدا   :
-سېغىنىشقا بەرگىن ،-دەپ،- بەرھەم  !

مۇڭغا ئورۇن بوشاتتى شادلىق ،
باستى تاغدەك دەرتلەر شۇ قەدەر .
بېرەر ئىدى  سۆيگۈڭ  نىجاتلىق ،
سەندە  زەررە  كۆرۈنمەس ئەسەر .

تارتماي تۇرۇپ ئەسلا دىل رايىڭ،
دېدار ئىزدەپ كەلگەن سەن نىچۈن ؟
قەلبىمدە جاي تاپسا سىمايىڭ ،
ھېسلىرىڭغا بوپقالدىم يۇچۈن .

يانمايدىكەن كۆڭۈلنىڭ پەيلى ،
بۇيرىغىمغا قىلماس رىئايە  .
ئاغرىنمايمەن  سۆيمىسەڭ مەيلى ،
بوي  كۆرسەتسەڭ ئىدى   كۇپايە ......

ئىچىمدە ئوت   گۈر -گۈر كۆيىدۈ ،
روخسارىمدا سارغىيىش پەسلى .
پىراغىڭدا  ئاشىق  ئۆلىدۇ ،
كۆرۈشمىسەك  بوپتىكەن ئەسلى !

ئاپتور :بورتالا شەھەرلىك رادىئو -تېلىۋېزىيە  ئىستانسىسىدىن