چۈش (نەسىر) 

 مىھىرگۈل نۇرمۇھەممەت

قاپقاراڭغۇلۇقتا كېتىۋاتىمەن ، سەپەرگە . ياخشى كۆرىشىدىغانلىرىم بىلەن . توساتتىن ، ئ‍ۇلار  يىراقتىكى بىر دۆڭنىڭ  ئ‍ارقىسىغا ئ‍ۆتۈپ غايىپ بولۇشتى .
__قېنى سىلەر ؟!  نەگە بارىسىلەر؟! توختاپ تۇرۇڭلار !…
ئۇلار ھېچ  ئ‍اڭلايدىغاندەك ئ‍ەمەس .

  باقتىم . لەنىتىي دۆڭنىڭ يېنىدا بىر تۈپ دەرەخ ، كېچىدىكى بۇ دەرەخ  خۇددى گىگانىت دىۋىنىڭ ھەيكىلىدەك ماڭا قاراپ تۇراتتى ، سۈرلۈك .
 
تۈرلۈك تېڭىرقاش ۋە قورقۇنچ  ئ‍ىچىدە ، تىپىرلايىتتىم ، ھەريانغا يۇلقۇناتتىم . كۆز ئ‍الدىم بىردىنلا قاراڭغۇلىشىپ ھېچنەرسىنى كۆرەلمىدىم . نېمە ؟؟! ئۇشتۇمتۇت ھاۋا گۈلدۈرلەپ، ھەممە جاينى ۋەھىمە  قاپلىدى . كۈچلۈك چاقماق ئ‍اۋازىدىن خامۇش بولغان تېنىمنى ئاللىقاياقلارغا سۆرەپ كېتىۋاتىمەن ...

كۆرگۈلۈك ؟؟! شۇ قاراڭغۇلۇق ئ‍ىچىدىن بىر ئ‍ىتنىڭ ماڭا قاراپ شىددەت بىلەن ئېتىلىپ كېلىۋاتقانلىقىنى كۆرۈپ قالدىم ، غۇۋا ئېسىمدە قېلىشىچە غۇۋا كۆرۈپ قالدىم  . تېنىم شۈركەندى ، ئەقلىم سىلكىندى  ھەم ، ئ‍ارقىمغا ئ‍ۆرۈلۈپ قاچتىم . كېچىدەك قارا ئىتتىن قۇتۇلۇش ئۈچۈنلا ئالدىمدىكى پەرق ئەتكۈسىز قاراڭغۇلۇققا ئۆزۈمنى ئېتىۋاتىمەن  ...
 
كىمدۇر بىرىگە :«مېنى قۇتقۇزغىن !!! » دەيتتىم ئ‍ىچىمدە ...

يۈرەك زەرداپ ، ھال ئېغىر ... ۋاز كەچمەكچى بولدۇم ، شۇ پەيت ئ‍الدىمغا يەككە تاملىق بىر ئۆي ئۇچرىدى ، ئارتۇق ئويغا ئويۇم يەتمەي دېرىزىگە ياماشتىم . تەلىيىمگە قارا ئ‍ىتنىڭ شۆلگەي تۆكۈلۈپ تۇرغان ئ‍اغزى ماڭا يەتمىدى .
 
قاتتىق گۈلدۈرماما يەنە ، چۆچۈدۈم ، بىئىختىيار ئ‍اسمانغا قارىدىم . يامغۇر ئەمەس، يۇلتۇزلار تۆكۈلىۋاتاتتى  ... مىڭ توۋا !!! ئ‍ايمۇ توختىماي پىرقىراۋاتىدىغۇ !!؟ ...

پۇت -قوللىرىمدا نە جان قالمىدى ، نە دەرمان . يېتىرقاش ، ئەلەم ، ۋە قورقۇنچتىن بوغۇزۇم قىسىلدى ، نەپسىم سىقىلدى ، يۈرۈكۈمگە يىغا ياماشتى شۇئان ...
 
      ... ...

شۈكرى ، ئ‍ايلىنىپ كېتىشىمدىن بۇرۇن ئ‍ويغىنىپ كەتتىم .

قاباھەتلىك چۈش !!!

كۆز ئ‍الدىمدىكى رىئاللىق بىر ھازا خىيالىمدىن كەچتى .

__ ياق !!! ، دېدىم ئۆزۈمگە ،__ بۇ چۈش ئەمەس، بەلكى،  قاباھەتلىك رىئاللىق ! رىئاللىق بۇ !! چۈشۈم بولۇپ قېلىشىنى نەقەدەر ئ‍ارزۇ قىلاتتىم- ھە!؟

__ ئ‍ەي، ئ‍ازاب دەستىدىن پالەچلەنگەن روھ ...__ دېدىڭ .

__ بۇمۇ بىر بەخىت ،__ دەيمەن ئ‍ۆز ئ‍ۆزۈمگە .