ئۆتۈپ كېتىدۇ
دىلزات ئابدۇماناپ( ئەركە )
كۈز پەسلىگە ئوخشايدۇ ھايات ،
گاھى غازاڭ تۆكۈپ كېتىدۇ .
ئارزۇلىرىڭ بولغاندا بەربات ،
سەبىر قىلغىن ئۆتۈپ كېتىدۇ .
كۈتكىنىڭدەك بولماس ھەممە ئىش ،
گاھى قىينار مىڭلىغان تەشۋىش ،
تارتساڭ ئەگەر ئازاپ ۋە كەچمىش ،
سەبىر قىلغىن ئۆتۈپ كېتىدۇ .
ئەگرى- توقاي ھاياتلىق يولى ،
گاھ توسايدۇ يامانلار قولى ،
تەۋرىگەندە ھاياتىڭ غولى ،
سەبىر قىلغىن ئۆتۈپ كېتىدۇ .
ھايات گويا شىددەتلىك ئېقىن ،
گاھى كۈلۈپ يىغلايسەن لېكىن،
يامان كۈنلەر كەلگەندە يېقىن ،
سەبىر قىلغىن ئۆتۈپ كېتىدۇ .
ساختا سۆيگۈ بۇزۇلار ھامان ،
تاشلاپ كېتەر (مەڭگۈلۈك )جانان ،
كۆپۈكلەرگە ئايلانسا ئارمان ،
سەبىر قىلغىن ئۆتۈپ كېتىدۇ .
باقى ئەمەس ئىنسانغا ئۇزلۇق ،
چۈنكى ، ھامان ئېرىيدۇ مۇزلۇق ؟
يوقلاپ كەلسە سېنى يالغۇزلۇق ،
سەبىر قىلغىن ئۆتۈپ كېتىدۇ .
ياخشى بىلەن تەغدىرىڭنى قات ،
كۈلسە كۈلگىن ،جاپانى تەڭ تات ،
كۈتكىنىڭدەك بولمىسا ھايات ،
سەبىر قىلغىن ئۆتۈپ كېتىدۇ .
2015.11.16
121 قېتىم كۆرۈلدى | delzat8 | ئەسەر يوللىغۇچى : | |
2016-2-4 12:23:11 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|