يىللارغا....
قادىر ئابلەت

تۈنۈگۈنلا ئىدىم بىر بوۋاق،
بۈگۈن بىشىمدا،
سانسىزلىغان ئاق.
بۇ يىللارنىڭ سوۋغىسىمۇ؟
ياق،ياق...
بۇ يىللارنىڭ ھەيۋىسى شۇنداق.
مۇرادىڭغا يەتتىڭمۇ يىللار؟
باشلىرىمغا سانجىپ سانسىز ئاق،
ۋاي، ئايلىناي قورۇقلىرىڭدىن
كۆرەڭلەپ كەتمە،
بوينۇڭغا بىر تازا قاراپ باق،
يۈسۈپ خاس ھاجىپ،
مەھمۇد قەشقەرىي
يەنە.....
سىلىپ قويدى بوينۇڭغا تاقاق،
نوچى بولساڭ ئۇنى ئىلىپ باق.
مەنمۇ بىر كۈن سالىمەن چوقۇم
ئۆلۈم بىلەن قورقۇتالمايسەن،
قورۇق بىلەن ھەم،
بىشىمدىكى ئاشۇ ئاقلىرىڭ،
مەن ئۈچۈن ئۇ ئاق رەڭلىك بوياق.

2016-11-29 قارىقاش