مۇڭسىرايدۇ رەت-رەت بىنالار (شېئىر) 

 ماھىنۇر ئابدۇرھېم

شەھەرلەردە  رەت-رەت  بىنالار ،
قەد كۆتۈرگەن  شۇنچىلىك  ئېگىز.
بىر  ئېشىكتىن چىقار مىڭ  ئادەم،
ناتۇنۇشتەك ئۆتىشەر تېز- تېز  .

بوسۇغىدا  ئۇچرىشار ھەر  كۈن،
ئەمما  قىزغىن سالام قىلىشماس .
باش لىڭشىتىپ  ئۆتۈپ  كېتىدۇ،
بىلدىم ،ئەسلى قەلبى  تونۇشماس.

قوشنا  ئايال قوشنا  ئايالغا  ،
سوغۇققىنە  ئۆتىدۇ قاراپ  .
كۆز  قىسىشىپ  ئۆتەر   بالىلار،
تونۇشمىغاچ  كىتىدۇ   ماراپ .

مۇڭسىرايدۇ  رەت- رەت   بىنالار،
خۇددى  ئۇندا  يۈتكەندەك   سادا .
كۈلكە  چاخچاق  ئاڭلانماس  نىچۈن؟
شۇنچە  يىقىن  تۇرسىمۇ  ياندا  .

مۇڭسىرايدۇ  رەت-رەت  بىنالار ،
گەرچە  ئېگىز  ھەيۋەت بولسىمۇ .
سۇنۇشمايدۇ  تاماق   ئۆزئارا  ،
ئۆيدە  ھەممە  ئېشىپ   قالسىمۇ .

مۇڭسىرايدۇ  رەت-رەت   بىنالار ،
مىھرى -شەپقەت  سۇسلىغان  ئاندا .
سانجاق-سانجاق  بىنالار   غېرىپ،
ياش  تۆكىدۇ  ئۈنسىز  ئارماندا .