ئاي يۈزۈڭدىن ئۇيۇلىدۇ ئاي 

تۇرسۇن ئىمىن شەيدائى 

(شىنجاڭ يازغۇچىلار جەمئىيىتىنىڭ ئەزاسى )

نىگاھلارنى قىلۇر بىئارام ،

زىلۋا بويۇڭ سۆيگۈلەرگە باي .

سۇمبۇل چېچىڭ دىلنى ئەيلەپ رام ،

ئاي يۈزۈڭدىن ئۇيۇلىدۇ ئاي .

ئاھۇ كۆزۈڭ ھەم  قەلەم قېشىڭ ،

جاننى ئېلىپ سالار يەنە جان .

زىبالىقتا يوقتۇر تەڭدىشىڭ ،

پەرىلەرگە سەن تەنھا خاقان .

تىلىڭدىن يار تۆكۈلۈپ كەۋسەر ،

پاك كۆڭلۈمنى يايرىتىدۇ شاد  .

شوخ كۈلكەڭدىن يۈرەك تەۋرىنەر ،

لەۋلىرىڭدە ياشنايدۇ ھايات .

بولدى ساڭا بارلىغىم ئەسىر ،

بەرگىنىڭدە سۆيۈشكە ئىمكان .

مۇھەببەتتىن ياساپ ئۇز قەسىر ،

يۈرىكىمدە تۇتتۇڭ سەن ماكان  !...

ئاپتور :بورتالا شەھەرلىك رادىئو -تېلېۋىزىيە ئىستانسىسىدىن