ئامالسىز قالدىم

ئابدۇللا ئابدۇلمەجىد ئۇچقۇن

كۈلپەتلەر ئىچىدە قالدىمغۇ بۈگۈن ،
ئىچىمنى تاتىلايدۇ يېشىلمەس تۈگۈن .
گۇناھىم يوق ئىدى بولدۇمغۇ سۈرگۈن،
چارەم يوق ھەممىگە ئامالسىز قالدىم.

ئارزۇيۇم كۆپ ئىدى توزۇپ كېتەرمۇ،
جان ئانام كۆزلىرى ياشقا تولارمۇ .
كىبىرلىك ئىنسانلار ۋەيران بولارمۇ،
چارەم يوق ھەممىگە ئامالسىز قالدىم.

بېشىمغا دەرىت كەلدى دوسلار ئازايدى،
ئەسلىدىن كەڭ يوللار ئەمدى تارايدى .
كۈن چۈشكەن ھويلىلار ئەمدى قارايدى،
چارەم يوق ھەممىگە ئامالسىز قالدىم .

ئاقكۆڭۈل دوسلۇرۇم يېنىمغا كەلگىن ،
ھەقىقەت يولىدىن ئاماللار تەرگىن .
قېرىنداش سۈپىتىدە مەسلىھەت بەرگىن،
چارەم يوق ھەممىگە ئامالسىز قالدىم.

ئىزدىنەي ياخشىلار چىقىپمۇ قالار ،
بىر كۈنى قەلىبلەر مېھىرگە تولار.
«ئۇچقۇن»مۇ لاۋۇلداپ يانارتاغ بولار ،
ھازىرچە چارەم يوق ئامالسىز قالدىم.

زارلانمايمەن تەقدىرىم شۇنداق ئوخشايدۇ،
ماڭا ئازار بەرگەنلەر ھامان قاخشايدۇ .
ئۇلارمۇ بىر كۈنى زار زار يىغلايدۇ ،
ھازىرچە چارەم يوق ئامالسىز قالدىم .

2016-يىلى 10-ئاينىڭ 20-كۈنى كەچ    ئۈرۈمچى
پىكىر تەكلىپ بولسا : QQ:2816722994
ئۈندىدار :sabir098
ئەمگىكىگە ھۆرمەت قىلىڭ