بولسىمۇ
( غەزەل )
تۇرسۇن ئىمىن شەيدائى

ئىچمىگىن ناكەس سۈيىنى گەرچە كەۋسەر بولسىمۇ ،
سۆيمىگىن كۆرگەن گۈزەلنى كۆكتە ئەختەر بولسىمۇ .

دىل بېرەلمەس غەيرى "مەشۇق " غەمگۈزار جۆرەڭ كەبى ،
سۆزلىرى شېرىن سۈخەن ،بۇيى مۇئەتتەر بولسىمۇ .

جىلۋىگەرلەر باغرىدا قۇترايدۇ شەيتان قىل ھەزەر ،
نەپ ئېلىشتۇر مۇددىئاسى (يۈز تۆكۈپ يەر بولسىمۇ ) .

قاش ئويناتسا نازلىنى ئۇ ،بولمىغىن غاپىل -نادان ،
"پىدايىڭمەن ،كۆيگىنىمنى بىلمىدىڭ دەر بولسىمۇ "  .

كور ۋىجدانى ،ئار -نۇمۇسسىز ( قىلغان ئەجرىڭدىن تانار ) ،
ھىممىتىڭگە يەتكىچە نائىل -مۇيەسسەر بولسىمۇ .

ئۆز گۈلۈڭنى قىبلەگاھ ئەت چىن ساداقەت بابىدا ،
ئۆزگە "گۈل"نىڭ تىكىنى كۆپ ،مۈشكى ئەنبەر بولسىمۇ .

خانەڭنىڭ بو سۇغىسى پانىيدىكى جەننەت ساڭا ،
ھېچ ئەسقاتماس ئۆزگە قەسىر توپىسى زەر بولسىمۇ .

ئاپتور:  شىنجاڭ يازغۇچىلار جەمئىيىتىنىڭ ئەزاسى ،
بورتالا شەھەرلىك رادىئو -تېلېۋىزىيە ئىستانسىسىدىن