ۋىسالىڭغا ئەتكىن مۇيەسسەر  
تۇرسۇن ئىمىن شەيدائى
(  شىنجاڭ يازغۇچىلار جەمئىيىتىنىڭ ئەزاسى )

بار نە سېھىر سەندە بىلمىدىم ،
ئاشىقلىققا قىلدىڭ  گىرىپتار .
ھىجرانىڭدا بىر رەت كۈلمىدىم ،
كۆڭۈل قۇشۇم تۇرسا  خېرىدار .

ھېسلىرىمغا سالدىڭ سەن كىشەن ،
ئەتراپىڭدا پەرۋانە بۇ تاپ  .
سەۋدايىڭمەن ،سۆزۈمگە ئىشەن ،
ئاھ سېنىڭسىز يۈرىگىم بىتاپ .

ئايرالمىدىم كۈندۈز ،يا تۈننى ،
سۈرلۈك بېقىپ پىراق زۇلمىتى .
تارتىپ ئۆتتۈم  بۇ شورلۇق كۈننى ،
بولسىمۇ گەر تاغدەك كۈلپىتى .

سېزەر بولساڭ   ئىلكىڭگە سېنىڭ ،
تۇيغۇم تۇرماق ،ئىدراكىم تۇتقۇن .
يوق تاقىتىم زەررىچە مېنىڭ ،
كەتمەس  بولۇپ كەل- باغرىمغا قون .

بەختىڭ  ئىزدەپ كەيدۈرەي دەپ تاج ،
يۈردۈم ھىجران يۈكىنى ئارتىپ .
ئەيلىمىگىن تەلىيىمنى كاج ،
قىساسىمنى قالىسەن تارتىپ .

سۆيۈلۈشتىن ئارتۇق ئامەت يوق ،
يىمە ۋايىم ئارلىنىپ  زارلاپ .
سۇندۇم  ساڭا مېھرىمنى تولۇق ،
چەيلىمىگىن  ئەقىدەم خارلاپ .

سۆيگۈڭ تىلەپ تۇيغۇلار تىترەر ،
سارايىڭغا تەلمۈرەر نىگاھ .
ۋىسالىڭغا ئەتكىن مۇيەسسەر ،
گۈل سىمايىڭ تەقدىرىمگە شاھ .

ۋۇجۇدۇمدا تونۇرنىڭ تەپتى ،
ئۆز قولۇڭدا ئوتقا بەرھەم بەر .
بەرگى غازاڭ مەجنۇنىڭ ئەپتى ،
تىنىغىڭسىز تىنىغىم ئۆچەر .

ئاپتور :بورتالا شەھەرلىك رادىئو -تېلىۋېزىيە ئىستانسىسىدىن
2017.3.23