مەرىپەت مەشئىلى قولۇڭدا ئۇستاز

تۇرسۇن ئىمىن شەيدائى

( شىنجاڭ يازغۇچىلار جەمئىيىتنىڭ ئەزاسى )

ئىلىمسىز دىللاردا جاھالەت كېزەر ،
ئىدراكلار غاپىللىق ئىلكىدە نىمجان .
ئاتمايدۇ تەپەككۈر تاڭلىرى ئەسلا ،
بۈگۈن دەپ ياشايدۇ ساپاسىز  ئىنسان .

خۇراپات ئەزۋەيلەپ مىنەر گەجگىگە ،
نادانلار ئۆتىدۇ بىر ئۆمۈر قاخشاپ.
قاششاقلىق خورىتارھەرمەھەل روھنى ،
دېشۋارلىق دەشتىدە چەكتۈرۈپ ئازاپ .

سېنىڭسىز نەدىكىن ئەقلى كامالەت ،
ئەجرىڭدە ئىچمىسەك ئىرپاندىن كەۋسەر ؟
تاپالماس جەمئىيەت يۈكسىلىش-ئۆرلەش ،
پەرۋىشكە قىلمىساڭ نائىل -مۇيەسسەر .

يۈرىگىڭ مىسالى ئوت -ئاتەش ،ھامان -
ئەۋلاتلارسۆيگۈسى تەپتىدە يانغان .
پىداكار ئىنسانسەن مىننەتتىن يىراق ،
مەنىۋىي يۈكسەكلىك بېغىشلاش - ئارمان .

ئىرپانغا  بەخشەندە قىلدىڭ بارلىغىڭ ،
ئاقاردى چاچلىرىڭ كۆمۈش رەڭ  ئېلىپ .
سەبىلەر چېھرىگە كۆچۈپ ياشلىغىڭ ،
چاقنىدى پاك ئەجرىڭ  جۇلالىق -قېنىق .

سسېنىڭسىز يۈكسىلىش تاپالماس جاھان ،
روھىيەت تاپمىسا ئىدراكتىن مادار .
سەن باركى ،ئىلىم -پەن كامالىتى يار ،
ھۆرمەتلەر تاشقىنى ئاقىدۇ ھەر ئان .

جەسۈرسەن ، بەستىڭدە تاغلارچە سۇبات ،
يات ساڭا شەخسىيەت بۇ بىر نەمۇنە .
ئۆرلەشكە  بېرىسەن ھېچ  تالماس قانات ،
خىسلىتىڭ بىزلەرگە ئېسىل ئەنئەنە .

ۋىجدانىڭ پاكلايدۇ باسقان ئىزىڭنى ،
ياسايسەن تەر تۆكۈپ ئۈز -كۆركەم گۈلزار .
نۇرلارنىڭ ئۆركىشى بېزەر دىلىڭنى ،
تەپەككۈرخەزنەڭدە بىھېساپ زەر بار .

قۇرالىڭ ئاددىلا قەغەز ھەم قەلەم ،
كېبىردىن بىر ئۆمۈر خالى -يىراقسەن .
سەن شۇنداق ھۆرمەتكە سازاۋەر ئادەم ،
قاراڭغۇ دىللارغا ياققاچقا چىراق .

كۈلپەتكە قۇل بولۇر بىلىمسىز ئەما ،
دەشتلەردە قاخشايدۇ  زارلىنىپ   ياياق .
دىتسىزنىڭ ھالىنى ئەسلا سۇرىما ،
روھىيەت ئەۋرىزى تويغۇزىدۇ جاق  .

جىسمانى بىمارنى ئەملەيدۇ دوختۇر ،
قاششاقلىق يولۇقسا قوللىرى تىترەر .
جاھاندا سېنىڭدەك شىپاگەر يوقتۇر ،
بىئەقىل مۇردىمۇ زۇۋانغا كىرەر  .

كىملىكنى ،ئۆزلۈكنى بىلمىگەن خەلىق ،
پانىيدا دوزاققا بولىدۇ مەھكۇم .
خوراپات ئوكيانغا  بولىدۇغەرىق ،
جاھالەت قەھرىڭدە بولۇپ كۇمپەيكۇم .

يايرىغىن  ئۇستازىم ھۆرمەت تەختىدە ،
مەرىپەت يولىدا  ياندۇرۇپ مەشئەل .
ئۇل سالغىن تىنىمسىز ئەۋلات بەختىگە ،
ئۈگىنىش ئىستىگى بولسۇن سەندە ھەل .

نەزمەمدە شەنىڭنى ئەيلىدىم بايان ،
مېنىتىڭ ئۆزلۈكسىز تاپسۇن دەپ راۋاج .
تەرىپىڭ دىللاردا يارقىن نامايان ،
ئەل -ۋەتەن بېشىڭغا كەيدۈرىدۇ تاج  !


ئاپتور
بورتالا شەھەرلىك رادىئو -تېلېۋىزىيە ئىستامسىسىدن

2017.3.4