ئايرىلىش بېكىتى

ئابلىكىم غوپۇر ئوتقاش

خوشلاشتۇق بىز ئاشۇ بېكەتتە،
قوللىرىمدىن ئاجرىدى قولۇڭ.
مەن تىلەيمەن ساڭا ئامانلىق،
گۈلگە تولسۇن باسقان يوللۇرۇڭ.

كۆيدى جىسمىم ھەسرەت ئوتىدا،
ئاھ يۈرىكىم كەتتى سەن بىلەن.
شېرىن كۈنلەر بولدى ئەسلىمە،
يار ئازابىڭ قالدى مەن بىلەن.

جۇدۇن باستى باھار پەسلىنى،
باغلىرىممۇ بولدى زىمىستان.
سەنسىز ئايدىڭ ماڭا قاراڭغۇ،
باغرىم تىلىپ ئۆكسۈيدۇ ھىجران.

ۋۇجۇدۇمنى باسىدۇ تىترەك،
شوخ كۈلكەڭنى ئېسىمگە ئالسام.
بۇلبۇل يىغلار مېنىڭ ھالىمغا،
مەجنۇن بۇلۇپ يىگانە قالسام.

2016-يىل 25-دېكابىر
(مارالبېشى)