پۇلۇڭ بولسا  

 دىليار خېلىل

ساماۋەرلەر قاينايدىكەن ئ‍ەجەپ شاتلىق ،
پۇلۇڭ بولسا مېھمانى سەن ساھىپخاننىڭ.
ئ‍ۇيۇپ تۇرار پېيالەڭدە ساڭا قېتىق ،
پۇلۇڭ بولسا دۇئاسى سەن داستىخاننىڭ.

ئ‍وڭ بولاركەن قىلغان ھەربىر توڭ گېپىڭ ،
ئ‍وينىتاركەن ھەممىنى شوخ چالغان دېپىڭ.
ئ‍ەتراپىڭدا  پەرۋانە  يانسا  چىرىغىڭ ،
دوسلىرىڭمۇ دوست بولىدۇ  پۇلۇڭ بولسا .

سېنىڭ ئۇچۇن ئ‍وڭ بولاركەن ھەتتا پەلەك ،
سېنىڭ ئۈچۈن سۇ توشاركەن ھەمدەچېلەك .
ئ‍ات دېگىنىڭ  تۇلپار دۇر  بولسىمۇ  ئ‍ېشەك ،
سۆزلىرىڭمۇ  سۆز  بولىدۇ  پۇلۇڭ  بولسا .

ئ‍ەجەپ تاتلىق كۆرىنىدۇ سەت خۇيۇڭمۇ ،
ساڭا  پېدا سۆيىنىدۇ  سۆيگىنىڭمۇ .
تۇققان تولارتاغ كەينىدەبولسا ئ‍ۆيىڭمۇ ،
تۇققۇنىڭ تۇققان بولىدۇ پۇلۇڭ بولسا .

تېپىلمايدۇ بۇئالەمدە سەنچە قالتىس ،
بىلىنىسەن ھەر ئ‍ادەمگە شۇنچە خالىس.
نەپلىرىڭدىن ياغار ساڭا داستان ئ‍القىش ،
يۇزلىرىڭمۇيورۇق بولىدۇ پۇلۇڭ بولسا .

سېتىشاركەن مەنپەتلەرگە پۇلسىز دىلنى ،
گال قىلاركەن ھەقېقەتكە پۇلسىز تىلنى .
دال قىلاركەن تۆھمەتلەرگە پۇلسىز قولنى،
قارىلىرىڭ  ئ‍اق  بولىدۇ  پۇلۇڭ  بولسا .