ئايرىلىش

نەسىر 

   ئايرىلىش ـــــ گۈلدۈرماما گۈلدۈرلەپ ، زېمىن تىترىدى. كۆك ئاسمان قايغۇ-ھەسرەت ئىچىدە ياش تۆكۈپ يىغلىدى.

 ئايرىلىش ـــــ مۇقەددەس بۇغدا چوققىسى تۇيۇقسىز گۈمۈرۈلدى. ھەيۋەتلىك خانتەڭرى ماتەمدار بولۇپ ، گۈزەل پامىرياش تۆكتى .

  ئايرىلىش ـــــ قۇياش يۈزىنى قارا بۇلۇتلار توستى ، ئاي يۈزىنى توسۇپ ، يۇلتۇزلار مۇڭدا قالدى.

ئايرىلىش ـــــ گۈل ئىشقىدا خەندان ئۇرۇپ سايراۋاتقان بۇلبۇل سايراشتن توختاپ قالدى . چىمەنزارلادىكى گۈللەرھەسرەتتىن سولاشقىنىچە باشلىرىنى ئەگدى. 

ئايرىلىش ـــــ يۇلغۇنلار يۈزىگە قىزىل تەپچىرىپ ، توغراقلار كۈمۈش ياپراقلىرىنى تاشلىدى . گويا تەكلىماكان  ھىجراندىن  تولغىنىپ پىرقىراپ ، ئاسمان-زېمىن ئوڭ- دۈم بولدى .

ئايرىلىش ـــــ بورانلار ھۈركىرەپ،دەل-دەرەخلەرنى سۇندۇردى. دەھشەتلىك قۇيۇنلار غەزەپ ئىچىدە زېمىن يۈزىنى قاپلىدى.

ئايرىلىش ـــــ زەرداپقا تولغان يۈرەكنىڭ چوڭقۇر قاتلاملىرىدىكى ياشلار مارجان كەبى تۆكۈلۈشكە باشلىدى ، كۆزلەر نەملەندى ، خىرەلەشتى . ئاخىرىدا كۆرمەس بولۇپ قالدى . قۇلاقلار ھەسرەتتىن باشقىنى ئاڭلىماس ، يۈرەك سەزمەس بولۇپ كەتتى . ئارىلىقتا قەلەم قولغا چىقتى ، بىراق ھىجرانلىق ئىچىدە ئاڭقىراپ قالدى.

ئايرىلىش ـــــ يالغۇزلۇقنىڭ ، ئازاپنىڭ باشلىنشى . كۈزلەر كۆرمەس، كۆڭۈل خالىماس بولۇپ قالدى . ھاياتلىق مەنىسىنى يوقاتتى ، رەڭگىنى يوقاتتى . ھەممە مەنىسىز ، رەڭسىز ھەتتا ئۈمۈدسىز تۇيۇلدى.

ئايرىلىش ـــــ قاراڭغۇلۇققا باشلانغان ساياھەت .  گوياكى نام-نىشانسىز يولۇچى ، نەقەدەر ئىلاجىسىز، نەقەدەر بىچارە.

ئايرىلىش ـــــ ھەممە تۈگىدى . نە رەنجىش ، نە قىيالماسلىقلار،ئەمدى ھەممە نەرسە يوق . قالغىنى ، ئامالسىزلىق ، رەھىمسىزلىك ، يالغۇزچىلىق .

ئايرىلىش ـــــ گۈزەل بىر چۈش ئاخىرلاشتى . ئالدىڭدىكى رېئاللىق ، رەھىمسىز تەقدىر ، ئاجايىپ تۇرمۇش ......ساڭا قاراۋاتىدۇ . ئۇنىڭغا يىغلىساڭمۇ بولىدۇ ، كۈلسەڭمۇ بولىدۇ . پەقەت شۇ ، ئۆزۈڭگە باغلىق . جايىڭدا تۇرامسەن ياكى مىدرامسەن ، بۇ ئۆزۈڭنىڭ تاللىشى .

ئايرىلىش ـــــ بەلكىم قورقۇنچلۇق چۈشنىڭ ئاياغلىشىشىدۇر . سەن كۆزۈڭنى ئاچقىن ۋە ئەتراپقا نەزەر سال . قايسى مەنزىرىنى كۆردۈڭ ؟ ئۆزۈڭگە پۇرسەت بەر ، گۈزەل ئەتىدە ھەققىڭ بارلىقىنى ئۇنتۇپ قالما .

ئايرىلىش ـــــ بىزنى چۆرگىلەپ تۇرىدۇ . بۇنى ئۇنتۇپ قالمىغىنىڭنىڭ ئۆزى بىر سوۋغا .

تۆت قۇلاق قەلىمىدىن

2017-يىلى15-ماي كورلا

مۇھەرىر : ئابدۇقەييۇمجان ئابدۇسادىرى 

ئۈندىدار : 2041420589

مۇھەرىرلەر باھاسى : 

( ئەسەر قۇرۇلمىسى ياخشى ئورۇنلاشتۇرىلىپتۇ ،  ئۆزگىچىلىك بىلەن يىڭى ئۇسلۇپ بىرلىشىپتۇ )