سۆيگۈبىلەن گۈزەلدۇر دۇنيا
تۇرسۇن ئىمىن شەيدائى
شىنجاڭ يازغۇچىلار جەمئىيىتىنىڭ ئەزاسى

تاڭغا ئىجىل ئالەم -كەڭ جاھان ،
رەڭلەنگەچكە سېھىرگە تولۇپ
سۆيگۈدىن نۇر ئالىدۇ ۋىجدان ،
تاۋلىنىدۇ تەۋرەنمەس بولۇپ .

تاڭ دەپ بىلدىم مەن پاك سۆيگۈنى ،
نەپرەتتە تۈن سۈرىدۇ دەۋران .
مېھىرلەردە نۇرلار كەلكۈنى ،
يار ئەيلىسە كۆكلەيدۇ ئىنسان .

شۇ ۋەجىدىن تاڭلارنى سۆيۈپ ،
ئىلھام قىزى كۆتىرەر غەليان .
ئۆزلىگىم  تاڭ ۋەسلىگە  كۆيۈپ ،
كۈتەر قەلەم ھەر مەھەل پەرمان .

ئۆمۈر بېغىم ئاچار گۈل -چېچەك ،
تاڭ ۋەسلىدىن ھېسلار ئويغىنىپ  .
تاڭ زىياسى روھىمغا بېزەك ،
ئاتەش يۈرەك كېتەر چوغلىنىپ .


تاڭ ئاشىغى -مەستانىدۇرمەن ،
تۈن زۈلمىتى باغرىمدىن يىراق .
تاڭ ھۆسنىگە پەرۋانىدۇرمەن ،
ئىستەكلەرگە ياققاچقا چىراق .

ئالغان روھىم تاڭلاردىن ئەنداز ،
غۇبارسىزدۇر -تاڭ كەبى ئاپئاق .
چېھرىمدىن جاي تاپقان باھار ،ياز ،
ئاياز پەسلى كېرەكمەس ياق -ياق  !

سۇنالىسام مۇھتاجغا شەپقەت ،
كېزەر دىلنى مىسلىسىز ھۇزۇر
سۇلغۇن روھنى ياشنىتار ھىممەت ،
بېغىشلايمەن كۆڭۈللەرگە  نۇر .

ئارازچىلىق ،خۇراپات كۈلپەت ،
ئۆم -ئىناقلىق ،ئېرپان زەپ ئەلا .
چىن پۈتمىسەڭ ئاچ تارىختىن بەت :
جاھالەتتىن يىدۇق كۆپ پەشۋا .

«سەن»ھەم «مەن »نىڭ يىلتىزى تۇتاش ،
سۈرۈشتۈرسەك ئەجدادىمىز بىر   .
شەجەرىمىز تاڭلارغا سىرداش ،
باق ئىدراكتا :ئەمەستۇر بۇ سىر   !

سۆيگۈ  بىلەن  گۈزەلدۇر   دۇنيا ،
قوش گېزەكتۇر سۆيۈش -سۆيۈلۈش.
ھەسەتخورلۇق ئىنسانغا ۋابا  ،
سەن قۇت تاپساڭ مەندە سۆيۈنۈش .

سۆيگۈ ئىزدەپ ئۆتتۈم بىر ئۆمۈر ،
كۈيلىرىمدە ياڭراق ساداسى .
سۆيگۈ تېڭى ئەيلىدى غەييۇر ،
تىنىغىمدا ئىللىق ساباسى  !

ئاپتور : بورتالا شەھەرلىك رادىئو -تېلىۋىزىيە ئىستانسىسدىن