مەن شېئىر يازمايمەن نام -شۆھرەت ئۈچۈن
تۇرسۇن ئىمىن شەيدائى
شىنجاڭ يازغۇچىلار جەمئىيىتىنىڭ ئەزاسى

مەن شېئىر يازمايمەن نام -شۆھرەت ئۈچۈن ،
تۇيغۇلار تەۋرەنسە باردۇر نە ئىلاج .
ۋىجدانىم سوراقلار  :"ياتىسەن نىچۈن ،
ئىجاتنى  تاپقۇزغىن توختاۋسىز راۋاج !؟ "

مەن شېئىر يازمايمەن نام -شۆھرەت ئۈچۈن ،
يازساملا پاك كۆڭلۈم   تەسەللىي  تاپار  .
ئايرىلماس ھەمراھىم قەلەم  كۈنۇ -تۈن ،
شۇ سەۋەپ : قىسمىتىم  ئەشئارلارغا يار .

مەن شېئىر يازمايمەن نام -شۆھرەت ئۈچۈن ،
بىلسەڭ بۇ - ئىشتىياق تۇرغان يېلىنجاپ .
رايىم يوق ھەشەمگە  ئىنتىلەي نىچۈن  ،
غورۇرىم  بىھۇدە  بولمامدۇ خاراپ !؟

مەن شېئىر يازمايمەن نام -شۆھرەت ئۈچۈن ،
ئىلھاملار  دىلبىرى خۇش باقار پات -پات .
سۆيگۈ بۇ : روھىمنى  ئەيلىگەن  گۈلگۈن ،
تەپەككۈر  ئەۋجىدە قاققۇزۇپ قانات  .

مەن شېئىر يازمايمەن نام -شۆھرەت ئۈچۈن ،
مىننەتسىز بەدەلگە ئۈندەيدۇ ۋىجدان  .
قاراڭغۇ دىللارنى يۇرۇتسام پۈتۈن  ،
ئامەتلەر تەختىدە ھۇزۇرلىنار جان .

مەن شېئىر يازمايمەن نام -شۆھرەت ئۈچۈن ،
ئەجىرسىز ئاتاقتىن تېپىلماس نىجات  .
ئەل -ئاۋام  رايىغا قوشالىسام ئۈن ،
ئۆتكۈزگەن بولىمەن بەختىمدىن پارات .

مەن شېئىر يازمايمەن نام -شۆھرەت ئۈچۈن ،
بىلسەڭ مەن پەرۋانە ،شېئىردۇر چىراق .
تەمەلەر تاجى بىر ئاچچىق بۇس -تۈتۈن ،
قاچىمەن ئۇنىڭدىن ھەر مەھەل يىراق .

مەن شېئىر يازمايمەن نام -شۆھرەت ئۈچۈن ،
شائىرنىڭ  خىسلىتى   بۇ   ھالغا    رەقىپ .
ئويغاقتۇر يۈرىگى -غاپىللىق سۈرگۈن  ،
شەخسىيەت ،كېبىرلىك ئېتەلمەس تەقىپ .

ئاپتور بورتالا شەھەرلىك رادىئو -تېلىۋىزىيە ئىستانسىسىدىن

2017.3.30