ئۈمۈدسىزلىك سېنى يېڭىۋالمىسۇن
نەسىر
گۈلزىرە مەخمۇت
ھەممە ئىشنىڭ سەۋەپ نەتىجىسى بولىدۇ ، ئۈمۈدسىزلىنىشنىڭ سەۋەبىمۇ نۇرغۇن ، بىراق بۈگۈن مەن ئۆتمۈشىمدىن ئاغرىندىم. توغرا ، ئۆتمۈشنىڭ قولىدىن ھېچنىمە كەلمەيدۇ . ھەرقانداق كىشى ئۆتمۈشنى ئۆزگەرتىشكە ئامالسىز . ئۆتمۈش-ساڭا ھېچنىمە ئاتا قىلالمايدۇ ، بۇنداق دېسەم ھەيران قالما . مەن شۇ سېنىڭ ئۈمۈدسىزلىككە تولغان قاراڭغۇ كۈنلىرىڭنى دېمەكچى. سەن ئاشۇ خىل قاراڭغۇلۇققا مەھكۇم بولۇشتىن ساقلان . ئارقاڭغا قايرىلساڭ بولىدۇ . مۇھىمى، سېنىڭ نېمىلەرنى قولدىن بېرىپ ، نېمىلەرگە ئېرىشكىنىڭ . ئادەم بىر نەرسىگە ئېرىشىىش بىلەن بىر ۋاقىتتا، يەنە بىر خىل نەرسىگە ئېرىشىدۇ .سەن ئۈمۈدسىزلىكنى تاللىدىڭ ، قاراڭغۇلۇق ، ئاجىزلىق ، يالغۇزلۇق قاتارلىق پاسسىپ ئېنىرگىيىلەر ساڭا ھەمراھ بولىدۇ . ئەمما سەن ئۈمۈدنى تاللاپ باق ؟ ئۈمۈد ساڭا نېمىلەرنى ئاتا قىلىدىكىن ؟ ……
بىر دوستۇم ماڭا ئۆزىنىڭ ياشىغۇسى كەلمەيۋاتقانلىقىنى ئېيتتى. مەن ئانچە بەك ھەيران قالمىدىم . نېمىشقا ؟ ياشىغۇسى كەلمەي قېلىش-نورمال ئىش . بەزىدە تۇرمۇشنىڭ ھەرخىل سىناقلىرىغا بەرداشلىق بېرەلمەي ، ناھايىتى ئىلاجىسىز قالىسەن ، تۇرمۇشتىن زېرىكىسەن ، ياشاشنىڭ ھېچبىر لەززىتى يوقتەك ھېس قىلىسەن : مەن نېمە ئۈچۈن ياشايمەن ؟ نېمە ئۈچۈن ؟……نۇرغۇنلىغان چىگىش سۇئاللارنىڭ جاۋابىنى تاپالماي قىينىلىسەن، ئۈمۈدسىزلىنىسەن، ئۆز-ئۆزۈڭنى ئەيىپلەيسەن ، ھەتتاكى دۇنيادا ئۆزۈڭنى ئارتۇقچە ھېس قىلىسەن، ياشاشتىن ۋاز كەچمەكچى بولىسەن. دۇنيادا ئۆزىنى ئارتۇقچە ھېس قىلىشتىنمۇ ئارتۇق ئۈمۈدسىزلىنىش بولمىسا كېرەك ! ھاياتىڭدا ئۆز-ئۆزۈڭنى ئىنكار قىلدىڭ ، سەن ئۈمۈدسىزلىكنىڭ پاتقاقلىرىغا چوڭقۇرلاپ كىرىپ كېتىۋاتىسەن دېگەنلىك. بۇ جەرياندا ئۆزۈڭنى شۇنچىلىك كېرەكسىز ھېس قىلىسەن، ئۆز-ئۆزۈڭدىن نەپرەتلىنىسەن، يېقىنلىرىڭغا يۈك بولۇپ قېلىشتن قورقىسەن. ھەممە نەرسە سەندىن يۈز ئۆرۈپ كېتىۋاتقاندەك، ھەممە ئادەم سەندىن بىزار بولۇۋاتقاندەك، ئۆزۈڭنى ھەممىدىن تارتىسەن . يالغۇزلۇق سېنى قىينايدۇ، پۈتكۈل دۇنيارىڭ ئۈمۈدسىزلىك بىلەن تولغان .نە چارە ، نە ياردەم يوق ! ھاياتىڭ قاراڭغۇلۇققا چۆمگەن……
بۇ خىل قاراڭغۇلۇقتىن قۇتۇلۇش ئۈچۈن شۇنچىلىك تىرىشتىڭ، تىرماشتىڭ . بىراق، سىرلىق ئوردىدىن چۆرگىلەپ چىقالمايۋاتقاندەك ھېچقانداق ئىلگىرلەش يوق . نېمىشقا ؟ سەن ھاياتقا بولغان ئۈمۈدۈڭنى ، قىزغىنلىقىڭنى يوقاتتىڭ ، ئۆزۈڭنى ئۆزۈڭ ئىنكار قىلدىڭ ، ئۆزۈڭنى خار قىلىشنى تاللىدىڭ ، ئۈمۈدسىزلىكنىڭ قۇلىغا ئايلىنىشنى خالىدىڭ ……دەل شۇ ۋاقىتنىڭ ئۆزىدە دۇنيادا سەندىنمۇ بىچارە-ئاجىزلارنىڭ بارلىقىنى ئۇنتۇپ قالدىڭ . گەرچە پۇت-قولى يوق ،كۆزى كۆرمەس مېيىپ كىشىلەرنىڭ سەندىن ياخشى ياشاۋاتقانلىقىنى سەن كۆرمەسكە سالدىڭ ، ھېس قىلالمىدىڭ……ساڭا ھېكايە سۆزلەپ بېرەي ، قالغىنىنى ئۆزۈڭ ھېس قىل . چۈنكى ، قانداق قىلىشنى بەلگىلەيدىغان ئادەم يەنىلا سەن . ئۆزۈڭدىن باشقا ئادەم ساڭا ياردەم قىلالمايدۇ . شۇڭا ، بۇ ھېكايىنى قۇلاق سېلىپ ئاڭلا :
داڭلىق مۇزىكىشۇناش بېتخوۋىن ( 27 يېشىدىن باشلاپ قۇلاق كېسىلىگە گىرىپتار بولغان ، 30 يېشىدا كېسىلى تېخىمۇ ئېغىرلىشىشقا باشلىغان .بىراق ئۇ تەقدىرىگە تەن بەرمەي ئۈزلۈكسىز كۈرەش قىلىپ نۇرغۇنلىغان مۇزىكىلارنى ئىجاد قىلغان . 45 يېشىدىن كېيىن ، ئۇنىڭ قۇلىقى پۈتۈنلەي ئاڭلىماس بولۇپ قالغان . لېكىن ئۇ ھاياتىدا نۇرغۇنلىغان داڭلىق مۇزىكىلارنى ئىجاد قىلىپ داڭلىق مۇزىكىشۇناسقا ئايلانغان . ئۇنىڭ مۇنداق بىر جۈملە سۆزى بار :‹‹ ئازاپ كىشىنى تۈگەشتۈرىۋېتىدۇ ، لېكىن ئازاپ تارتقان كىشىمۇ ئازاپنى تۈگەشتۈرەلەيدۇ . ئىجادچانلىق قىيىنچىلىققا موھتاج، قىيىنچىلىق-تەڭرىنىڭ بەرگەن سوۋغىسى . قالتىس كىشىلەرنىڭ بىر ئالاھىدىلىكى بار: پايدىسىز ۋە قىيىنچىلىق شارائىتقا باش ئەگمەيدۇ !››. دۆلىتىمىزدىكى كۆزى كۆرمەيدىغان ناخشىچى ياڭگۇاڭ(杨光)نىڭ مۇنداق بىر سۆزى بار :‹‹كۆزۈم كۆرمەيدۇ ، بىراق مەن ناخشامنى كۆزى كۆرەلەيدىغان كىشىلەرگە ئېيتىپ بېرىپ ئۇلارغا خۇشاللىق بېغىشلايمەن .مەن كۆرەلمەيمەن ، بىراق مەندە قۇياشتەك بىر قەلب بار ››.
ئۇلارغا ئوخشاش مېيىپلار ئەتراپىمىزدا جىق، ئۇلارنىڭ نەتىجە قازىنىشى نورمال ئادەملەرگە قارىغاندا تېخىمۇ مۈشكۈل .بىراق ئۇلار بەل قويىۋەتمەي ، ئۈمۈدۋارلىق بىلەن ھايات يولىدا نەتىجە قازاندى . ئويلاپ باق دوستۇم ، سەن نېمە قىلىۋاتىسەن ؟ نېمە قىلىۋاتىسەن ؟ سەندىكى غەيرەت-شىجائەت ، ئىرادە-ئىشەنچ دېگەنلەر نەگە كەتتى ؟ سەن ئۈمۈدسىزلىكنىڭ قۇلىغا ئايلىنىپ قېلىش ئالدىدا تۇرىۋاتىسەن . ئۆزۈڭنى ئەڭ بىچارە دەپ ئويلايسەن ، ئەڭ بەختسىز دەپ قارايسەن . كۆزۈڭنى يوغان ئېچىپ قارا ، سەن يەنە ئۈمۈدسىزلىك ئىچىدە ياشىماقچىمۇ ؟ ياق ، بولدى بەس، يېتەرلىك بولدى ! سېنى ئەيىپلەۋېرىشكە كۆڭلۈم ئۇنىمايدۇ . توغرا ، ئۈمۈدسىزلەنمەيدىغان ئادەم يوق ، قاقشىمايدىغان ئادەم يوق ، بىراق مۇھىمى، ئاشۇ ئۈمۈدسىزلىكنى چۆرۈپ تاشلاپ ، يېڭى بىر يولنى ئېچىپ چىقىش . ھاياتنىڭ ئاچچىق-چۈچۈكلىرىنى ھېچكىم خالىمايدۇ ، بىراق ئەجىرسىز ھالاۋەتنىڭ بولمىغىنىغا ئوخشاش، ئاشۇ قىيىنچىلىقلار ، سىناقلار ساڭا تۇرمۇش ئۆگىتىدۇ . يا ئۆلۈم يا كۆرۈم دەپ ئۈزۈپ چىقىسەن تۇرمۇش دېڭىزىدىن.
بەزىبىر ئىشلارنى ئۆزگەرتىشكە قۇربىڭ يەتمىگەن ئىكەن ، ئۇلارنى قوبۇل قىلغىن، مېھرىڭ بىلەن سۆيگىن ، شۈكۈرلەر ئىچىدە ياشا، سەۋرلەر بىلەن ئىلگىرلە ! ھاياتىڭ شۇ چاغدا مەنىدارلىققا چۆمىدۇ . ئاجايىپ نەتىجىلەرنى قازانغان داڭلىق ئۇتۇقشۇناسلارنىڭ قاتارىغا كىرەلمىسەڭمۇ ، ئۆز تەقدىرىڭنى ئۆزگەرتكۈچىسەن . ئېسىڭدە بولسۇن ، پۈتۈن ۋۇجۇدۇڭ بىلەن بىر ئىشنى قىلماقچى بولساڭ ، ساڭا چوقۇم يول چىقىدۇ . گوياكى تامچە سۇ تاشنى تېشەر دېگەندەك ، تىرىشىپ باق ، كۈچەپ باق ، ئىلگىرلەپ باق ، سىناپ باق . ئۆزۈڭنىڭ قىلالايدىغانلىقىغا ئىشەن ، باشقىلار نېمە دېسە دەۋەرسۇن ! بىر ئىشنى پۈتۈن زېھنىڭ بىلەن قىلىۋاتقان چېغىڭدا ، ۋاقىت شۇنداق تېز ئۆتىدۇ . سەن قانچە كىرىشىپ قىلغانسىرى ، ۋاقىت تېخىمۇ تېز ئۆتۈشكە باشلايدۇ . ۋاقىتنىڭ ئۆتۈشىگە ئەگىشىپ ، سەنمۇ ئۆزگىرىپ ماڭىسەن ، ۋاقىت ھەممىنى ئىسپاتلايدۇ . سېنىڭ يەنە ئۈمۈدسىزلىنىدىغان ۋاقتىڭ بولمايدۇ . ھاياتنى قايتا تونۇيسەن ھەم ياخشى كۆرۈپ قالىسىەن، ھاياتتىن ئۈمۈد ئۈزۈشكە باھانە تاپالماي قالىسەن تېخى ! شۇنداق ، ئۆمۈر قىسقا، قىسقىغىنە ۋاقىت ئىچىدە ئۈمۈدسىزلىكنى يىراقلارغا پالىۋەت ، ئۇ ھاياتىڭغا كىشەن سالالمايدىغان ، سەندىن قۇرقىدىغان بولۇپ قالسۇن ! ئۆزۈڭنى قايتا تونۇ ، ئۆزۈڭنى سۆي ، شۇندىلا ھاياتمۇ سېنى سۆيىدۇ ! ساڭا ئۇتۇق تىلەيمەن دوستۇم ، ھازىرنىڭ ئۆزىدە ئورنۇڭدىن تۇرغىن ، مەن قىلالايمەن دەپ دادىللىق بىلەن قەدەملىرىڭنى ئالغىن ! ئۈمۈد ساڭا ھەمراھ بولغۇسى !
تۆت قۇلاق قەلىمىدىن
2017-يىلى 9-ئاپرېل كورلا
248 قېتىم كۆرۈلدى | sansiz99 | ئەسەر يوللىغۇچى : | |
2017-4-10 7:12:18 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|