چۈشلۈرۈم  

خەلچەم خېلىل 

ئ‍ىلىنىڭ يىلان باغرى يوللىرىدەك،
ئاشىقنىڭ مەغلۇپ بولغان تويلىرىدەك،
پادىچىنىڭ پىتراپ يۈرگەن قويلىرىدەك،
ئ‍ەنسىز چۈشلۈرۈم.

سۆيگۈدىكى ئ‍اچچىق چۈچۈك قىرتاقلاردەك،
بوزدۆڭدىكى سالا سالا،
ئ‍وتلاقلاردەك،
ئ‍انىسىدىن يىتىم قالغان  بوتىلاقلاردەك ،
كەچكۈزدە لەيلەپ چۈشكەن  ياپراقلاردەك،
تەنسىز چۈشلۈرۈم.

مەختۇمسىلانىڭ سۇدا ئ‍اققان چاچلىرىدەك،
سەنەمنىڭ سولغان قىياق  قاشلىرىدەك،
زۆھرەنىڭ  تارام- تارام ياشلىرىدەك ،
سەنسىز چۈشلۈرۈم.

روھى چىقىپ كەتكەن قۇپقۇرۇق تەندەك،
قولى يوق مەجرۇھ كىيگەن  
غېرىپ يەڭدەك،
ئاشىقلار قونۇپ ، كەتكەن
كونا دەڭدەك ،
جانسىز چۈشلۈرۈم.

ئ‍اخشامدىن سەھەرگىچە داۋاملاشقان،
شىمالدىن جەنۇپقىچە ساراڭلاشقان،
ئ‍ېتىز ئ‍ېرىق،تاغلار بويلاپ داۋان ئ‍اشقان،
بىربىرىگە گىرەلىشىپ باراڭلاشقان ،
سانسىز چۈشلۈرۈم......

2016.10.27