پۇشايمان

 ئابدۇمىجىت ئىمام غۇلجا

 كۆڭۈللەرنى كېزىپ كەلدىڭ پۇشايمان،

قەددىمىزنى ئېگىپ كەلدىڭ پۇشايمان.

ياشىغاننىڭ كۆزلىرىدە ياش بولۇپ ،

مەڭىزلەردە ئېقىپ كەلدىڭ پۇشايمان.

ھەسىرەتتىن ھەل بېرىلگەن تىغىڭ بار،

يۈرەكلەرنى تىلىپ كەلدىڭ پۇشايمان.

چۈشۈرىۋىلىپ قىلتىغىڭغا ئەقىلنى،

ئاچچىق دەرتكە سېلىپ كەلدىڭ پۇشايمان.

ئۆز قولىدا ئۆزنى باپلاش ھۈنىرىڭ،

بىزگە شۇنداق تېتىپ كەلدىڭ پۇشايمان.

ئوقيارىڭدا كىبىر غەپلەت بەتلەگىلىك ،

روھىيەتكە ئېتىپ كەلدىڭ پۇشايمان.

ئازدۇرۇشقا سەۋەپلىرىڭ تۈگىمەس،

نەپسمىزگە سىڭىپ كەلدىڭ پۇشايمان.

پىشانىگە ئۆچۈرۈلمەس مۆھرىڭدە،

بىر خاتالىق يېزىپ كەلدىڭ پۇشايمان.

2016/12/4