خەيرىلىك سەھەر خەيرىيە 

(ناخشا تېكىستى) 

 جامالىدىن يۈسۈپ يانار

خەيرلىك سەھەر  جانىم خەيرىيە،
خوش دەيمەن ساڭا كۆز يېشىم بىلەن.
كەتسەممۇ يىراق -يىراق جايلارغا،
قالار بۇ كۆڭلۈم ھامان سەن بىلەن.

خەير خوش ، ئەمدى جانىم خەيرىيە،
قالدى سۆيگۈمىز يۈرەكتە پىنھان.
يېتەي دېگەندە ، ئەمدى ۋىسالغا،
رەھىمسىز تەقدىر بەرمىدى ئىمكان.

خاتىرجەم بولغىن ، جانىم خەيرىيە،
ئەسلەيمەن سېنى ، ھەربىر قەدەمدە.
مۇھەببىتىمنى ساڭا بېغىشلاپ،
سۆيەرمەن سېنى ئىككى  ئالەمدە.

ئۈمىدۋار ياشا ، جانىم خەيرىيە،
باسمىسۇن  سېنى ھەسرەتلىك خىيال.
خۇشپۇراق چېچىپ  سۆيگۈ گۈلىمىز،
ئاخىربىر  كۈنى تاپىدۇ  ۋىسال.

2017-يىلى 4-ئاينىڭ 14-كۈنى تۇرپان شەھىرى
ئۈندىدار.13999460492