تىلەكسىز قالمىسۇن بارچە قەلىبلەر

يۈسۈپجان سايرامى   ( زىنھار  )

مەن بۈگۈن شۇنداق تىلەمچى ،
تىلمەسمەن ئەسلا پۇل-پۈچەك.
قەلىبدىن قەلىبكە بولسۇن تىلەكچى ،
رېئالىققا ئايلىنىپ ئارزۇ كىلەچەك .

ئاجىزلارغا كۈچ-قۇۋۋەت تىلەي ،
تەمەخورغا تەمەسىزلىك تىلەي .
ئىنساپسىزغا ئىنساپ تىلەي  ،
تىلەكسىز قالمىسۇن بارچە قەلىبلەر.

نەپسى بالاغا نەپسانىيەت تىلەي  ،
كۆڭلى قارغا ئاقكۆڭۈللۈك تىلەي   .
باغىرى تاشقا ئىللىقلىق تىلەي  ،
تىلەكسىز قالمىسۇن بارچە قەلىبلەر .

نادانلارغا ئەقىل-پاراسەت تىلەي  ،
ھاياسىزلارغا پاكىز دىيانەت تىلەي  .
بىتاپلارغا تەن سالامەت تىلەي  ،
تىلەكسىز قالمىسۇن بارچە قەلىبلەر  .

چۈشكۈنلۈككە ئۈمۈد تىلەي  ،
تىرىشقانلارغا بەركەت تىلەي.
تىرىك-تاپلارغا ھەرىكەت تىلەي  ،
تىلەكسىز قالمىسۇن بارچە قەلىبلەر  .

ھىيلىگەرلەرگە راستچىللىق تىلەي  ،
ئەمەل تۇتقانغا ئادىللىق تىلەي  .
چۈش كۆرگەنگە رېئاللىق تىلەي  ،
تىلەكسىز قالمىسۇن بارچە قەلىبلەر  .

ئەر-ئايال تۇرمۇشىغا بەخىت تىلەي ،
قىز-ئوغۇل ھەممىسىگە ۋىجدان تىلەي.
گۈللىسۇن ، ياشنىسۇن تەخىت تىلەي ،
تىلەكسىز قالمىسۇن بارچە قەلىبلەر  .

2016-يىل 12-ئاينىڭ 19-كۈنى
##ئاپتۇر ئەمگىكىگە ھۆرمەت قىلىڭ ##