تاپمىدىم 

دىلزات ئ‍ابدۇماناپ

 كۈندە ھاراق ئىچىپمەن ئ‍ۆزگە خىسلەت تاپمىدىم ،

(ھاراقكەش )دىگەن ئ‍اتاقتىن ئ‍ۆزگە نىممەت تاپمىدىم،

 كۈندە قاۋاققا يۈگرەشتىن ئ‍ۆزگە خىزمەت تاپمىدىم ،

كوچىلاردا دۈم يېتىشتىن ئ‍ۆزگە قىسمەت تاپمىدىم ،

 لەنەت ئ‍الدىم ئ‍ەلدىن تالاي ،ئ‍ۆزگە قىممەت تاپمىدىم .

 تۆت تەڭگىلا پۇل تاپسام يۈگۈردۈم مەن قاۋاققا،

كۆپۈكنى ھەم ئ‍وخشىتىپ يۈردۈم ھەتتا قايماققا ،

 پۇت- قوللىرىم ئ‍المىشىپ ئ‍ۆيۈم قالدى قاياقتا،

 نوچىلىق قىلىپ ئۆزەمچە ئ‍ۆلەي دىدىم تاياققا ،

شۇڭا تۆلەم پۇلىدىن باشقا ھىممەت تاپمىدىم .

مەستچىلىكتە مەرد بولۇپ ،پۇل خەجلەپ مەن ئاۋارە ،

لېكىن بېرەر قەرزىم كۆپ ئ‍ۆيۈممۇ ھەم ئ‍ىجارە ،

بالامغىمۇ خەجلە دەپ پۇل بەرمىدىم نە چارە ،

 ھاراق قىلدى مېنى پەس ،ھەم شۇنچىلىك بىچارە ،

 شۇڭا ئەلنىڭ ئالدىدا قىلچە ئىززەت تاپمىدىم .

 ئ‍ۆز ئ‍ۆيۈمدەك بىر ماكان قىلىۋالدىم قاۋاقنى ،

 گاھ مىلىنىپ پاتقاققا ،تەتۈر كىيدىم ئاياقنى ،

 ئ‍ۆيگە كېلىپ جار سېلىپ چاقتىم چىنە تاۋاقنى ،

ئ‍ويلاشمىدىم بېشىمدىن ئۆتكەن ئاچچىق ساۋاقنى ،

 ئ‍اتا -ئانام كۈتكەندەك ئ‍ارزۇ -مېھنەت تاپمىدىم. 

 ھەر رومكىنى بىر ئ‍ىچىپ چىقتى تالاي سەتچىلىك ،

 چاقچاق قىلدىم قىزلارغا بولغاچ ئ‍ېغىر مەستچىلىك ،

 ۋىجدانىمغا دەز كەتتى يامراپ كەتتى پەسچىلىك ،

 ئ‍ائىلەممۇ بۇزۇلدى بۇ نىمانچە تەسچىلىك ،

ئ‍ەمدى توۋا قىلىشتىن ئ‍ۆزگە زىننەت تاپمىدىم.

ئ‍ەمدى تاپاي ئەقلىمنى،ھالال ياشاي بولدى بەس،

 قىممىتىم يوق ياشاشمۇ ماڭا ئەجەپ بولدى تەس ،

كەيىپ ماڭا بولمىسۇن مەڭگۈلۈككە ھەمنەپەس ،

شەيتان مەندىن نېرى تۇر ،سەندىن بولاي مەن پەخەس ،

 چۈنكى ھاراق ئ‍ىچىپمەن قىلچە ھۆرمەت تاپمىدىم . 

 تۈزىتەي ئ‍ەمدى شۇڭا ، تۈگەشمىسۇن قىممىتىم ،

ياراملىق ئادەم بولاي پەخىرلەنسۇن مىللىتىم ،

ئ‍اتام بىلەن ئ‍انامغا جاۋاپ بەرسۇن زىننىتىم ،

قۇراي ئ‍ىللىق ئائىلە ، يوقالسۇن بۇ ئ‍ىللىتىم ،

چۈنكى ئ‍ۆيدەك ئ‍ېسىل بىر پارچە جەننەت تاپمىدىم .

دىلزات ئ‍ابدۇماناپ (ئ‍ەركە )

 2015.10.12j