قاپتىكەنمەن ئەسلى بىر قىزغا كۆيۈپ 

مۇھەممەد ئەركىن چىن يار

روھىمغا يىقىلغان يىرتىق بىر ئاسمان ،
كەلمەكتە ئېچىرقاق كۆڭۈلنى يۈدۈپ .
ۋىسالنىڭ ئالدىدا يىقىلدىم نەچچە ،
قاپتىكەنمەن ئەسلى بىر قىزغا كۆيۈپ .

قىينىلىپ ئاھ ئاران ئالىمەن نەپەس ،
ئازاپتىن قان قىلدىم لېۋىمنى چىشلەپ .
قونالغۇ ئىزدىدى دىلدىكى ئارمان ،
ئېھ سۆيگۈ شاتلىقنى كېلەمسەن! يېتلەپ .

كىشنەيدۇ مۇڭسىراپ ئېغىر خىياللار ،
بىھوشمەن سۈكۈتلەر ئالدى قاماللاپ .
ئۆزۈمنى تاشلىدىم ئەلەملىك ئوتقا ،
شۇ قىزنىڭ چېچىدا مەيلىمنى باغلاپ .