دۇنيادا ھەممىدىن خوتۇن بولماق تەس

ئاياللار ئەزەلدىن ئانا ۋارىسى،
ئائىلە ئۇلارنىڭ يۈرەك پارىسى،
خوش بولۇپ ئۆتكىنىڭ ئۇنىڭ سايىسى،
سالدىڭ سەن ئۇنىڭغا يۈرەك يارىسى،
ۋاقىتسىز ئۈۈلدى ياشلىق تارىسى،
دۇنيادا ھەممىدىن خوتۇن بولماق تەس.


قىز ۋاختى ئۆتەتتى ئويناپ خوش بولۇپ،
كۆڭۈل شاش يۇرەتتى شاتلىققىا تولۇپ،
يىگىتلەر كۆيەتتى يىراقتا تۇرۇپ،
تـوي قىلىپ پۇتىغا سالدى ئۇ قۇلۇپ،
ئۆتتى ئۇ قۇلۇپنى ئالالماي يۇلۇپ،
دۇنيادا ھەممىدىن خوتۇن بولماق تەس.

قوناقنى تېرىسا بۇغداي ئۈنمەيدۇ،
بۇغۇ بىر ھەقىقەت ئۆزگەرتىلمەيدۇ،
ھەيرانمەن بەزىلەر بۇنى بىلمەيدۇ،
بۇيرۇق قىپ قىز تۇغماي ئوغۇل تۇغ دەيدۇ،
قىز تۇغسا نەچچە ئاي گەپمۇ قىلمايدۇ،
دۇنيادا ھەممىدىن خوتۇن بولماق تەس.

مەينەت دەپ تىللايدۇ كىرنى يۇمىسا،
ئۆيلەرنى توبالاپ سەھەر تۇرمىسا،
ئاياللار ماشىنا ئادەم بولمىسا،
كۈندىلا ئۆيدە بار سىرتتا قۇنمىسا،
خاپا بولۇپ قىز تۇغۇپ ئوغۇل تۇغمىسا،
دۇنيادا ھەممىدىن خوتۇن بولماق تەس.

كىچىدە مەس كىرىپ خوتۇن قوپ دەيدۇ،
قۇساق ئاچ قازانغا ھالغىن چۆپ دەيدۇ،
قوپمىسا ئىلاجى يوق قۇربى يەتمەيدۇ،
مىڭ جاپا ئاش سالسا ئۇخلاپ يىمەيدۇ،
بۇنىڭغا كىمنىڭمۇ قۇساق كۆپمەيدۇ،
دۇنيادا ھەممىدىن خوتۇن بولماق تەس.

كۈن ئۆتەر بۇ ئەرنىڭ ھاراقلا ئىچىش،
مەس كىرسە بۇ ئۆيدە ئۇرۇش ۋە چېقىش،
خوتۇنغا ۋەزىپە تاياقلا يىيىش،
ھەيرانمەن مۇنۇ سۆز قۇرئاندا بارمىش،
خوتۇنغا ئېرىنىڭ تايىقى ھالالمىش،
دۇنيادا ھەممىدىن خوتۇن بولماق تەس.

ماڭار ئۇ يەسلىگە بالا كۆتۈتۈپ،
ئىشلەيدۇ خىزمەتنى باشنى چۆكۈرۈپ،
ئىشتىن كەپ ئالدىراپ ئۆينى سۈپۈرۈپ،
ئەتسىمۇ تاماقنى چۈشتە يۈكۈنۈپ،
تىللايدۇ بۇ ئېشىڭ خام دەپ تۈكۈرۈپ،
دۇنيادا ھەممىدىن خوتۇن بولماق تەس.

كۈن كۈنلۈپ بۇ ئەر يا ئۆيگە كىرمىسە،
ئاش ئەتسە بۇ ئېشىڭ خام دەپ يىمىسە،
نان ئالسا ناۋايدىن تېخى كۈنلىسە،
خوتۇننىڭ كۆڭلىنى ئاچاي دىمىسە،
بۇ دەرتنى جاھاندا ھىچكىم بىلمىسە،
دۇنيادا ھەممىدىن خوتۇن بولماق تەس.

قېيىن ئاپا ئالىيىپ تۇرۇپ سىلكىشى،
يارىماس كىلىننىڭ قىلغان ھەر ئىشى،
ئېرىنىڭ قاپاقنى تۈرۈپ تىللىشى،
بالىنىڭ ئاپا دەپ ئىڭراپ يىغلىشى،
مازاق قىلىپ خورازنىڭ بالدۇر چىللىشى،
دۇنيادا ھەممىدىن خوتۇن بولماق تەس.

جاپادا قېرىدى يۈزلەردە قۇرۇق،
دەپ ئۆتكەچ بىر ئۆمۈر" خوش ئېرىم قۇللۇق''
ئويلايدۇ ئۇ پەقەت ئەر دىگەن ئۇلۇق،
ئېرىنىڭ بەختىنى تىلەيدۇ يورۇق,
ئۇ بىلەر ھەممىدىن يامان دەپ تۇللۇق،
دۇنيادا ھەممىدىن خوتۇن بولماق تەس.

دىدىممەن ئاھ !خۇدا كۆردۈڭمۇ بۇنى؟
نىمىشقا ئايال قىپ ياراتتىڭ ئۇنى؟
ئۇيلاپ باق ئايالنىڭ تۆمۈرمۇ جېنى؟
بەندىلەر باراۋەر دىگىنىڭ قېنى؟
ئايالنىڭ ئوخشاشلا ئىسلامغۇ دىنى؟
دۇنيادا ھەممىدىن خوتۇن بولماق تەس.

ئويلۇندۇم شۇ ئەرلەر خوتۇن بوپ قالسا،
ئىشتىن كەپ كىچىدە سەي قۇرۇپ باقسا،
ھەر شەنبە بىر دۆۋە كىر يۇيۇپ باقسا،
تۇققۇز ئاي قۇساقنى كۆتۈرۈپ باقسا،
ئىنجىقلاپ جاپادا بىر تۇغۇپ باقسا،
شۇ چاغدا دەيتتى ئۇ خوتۇن بولماق تەس.