ئامرىقىمغا
گۈلزىرە مەخمۇت
قەلەمنى قولۇمغا ئالغىنىمدا ، ساڭىلا خەت يېزىشنى ئويلايمەن ؛ يانفونۇمنى قولۇمغا ئالغىنىمدا ، پەقەت ساڭىلا تېلىفون قىلىشنى ئويلايمەن . بىراق ، ئۇنداق قىلالمايمەن ، ئامالسىزمەن ! نېمىشقا دەمسەن ؟ چۈنكى سەن ھەممىدىن خەۋەرسىز ! سېنى ئەسلا ئاۋارە قىلغۇم يوق ، ھاياتىڭغا تۇيۇقسىز كىرىپ قويۇپ ، گاڭگىراپ - تەمتىرەپ يۈرۈشنى ئەسلا خالىمايمەن !
ساڭا دەيدىغان سۆزلىرىم شۇنچىلىك جىق !خۇشال بولسام ، ساڭا خۇشاللىقىمنى يەتكۈزۈشنى ئويلايمەن ؛ كۆڭلۈم يېرىم بولسا ، يەنىلا سېنى ئىزدەشنى ئويلايمەن ، ساڭىلا دېيىشنى خالايمەن . سېنى شۇنچىلىك ئىزدىگۈم كېلىدۇ ، شۇنچىلىغان ئادەملەرنىڭ ئارىسىدىن سېنىڭ سىمايىڭنى ئىزدەيمەن ، بىراق سېنى تاپالمىدىم !
سېنى ئۇچرىتىپ قالارمەنمۇ دەپ تونۇش كوچىلاردىن ئايلىنىپ ماڭىمەن بەزى چاغلاردا . لېكىن سېنى ئۇچرىتىپ باقمىدىم . ئەجىبا تەقدىرىمىزدە ئۇچرىشالماسلىق پۈتۈلۈپ كەتكەنمىدۇ ؟
بۈگۈن كۆڭلۈم شۇنداق يېرىم . سەۋەبى ناھايىتى ئاددىي ، بەزى ئادەملەر باشقىلارنىڭ ئاجىزلىقىنى باشقىلارغا ئويۇن قاتارىدا كۆرسىتىپ كۆڭلىنى ئېچىۋاتىدۇ . ئۇلارنىڭ بۇ قىلىقىنى كۆرۈپ مەيۈسلەندىم . سەنغۇ دېگەن ئىدىڭ ، ئادەملەر بىلەن ئادەم ئوخشىمايدۇ ، باشقىلارغا كەڭ قورساقلىق بىلەن مۇئامىلە قىلىشنى ئۆگەن ، دەپ . لېكىن ئويلاپ قالدىم ، ئاشۇ بەزىبىر كىشىلەر قانداق ئويلايدىغاندۇر ؟ نېمىشقا باشقىلارنىڭ ئازابى بەدىلى ئۈستىگە ئۆزىنىڭ خۇشاللىقىنى قۇرىدۇ ؟.....
‹بۇ ئۆتنە جاھان › دېگەن ئىدىڭ . شۇنىڭغا ئىشىنىمەنكى ، باشقىلارنى ئارقىدىن زاڭلىق قىلىپ كۈلگەنلەر ھامان بىر كۈنى ئۆزى باشقىلارنىڭ مازاق قىلىش نۇقتىسىغا ئايلىنىپ قالىدۇ .
سېنى شۇنداق كۆرگۈم كەلدى . بىراق كۆرەلمەيمەن . سېنى ئىزدەشكە جۈرئەت قىلالمايمەن . نېمىشقا ؟ سېنى راستىنلا ئاۋارە قىلغۇم يوق ! يىراقلاردا تۇرۇپ سېنىڭ بەختىڭنى كۆرۈپ تۇرۇشنى ئويلايمەن ! سۆيگەن ئادىمىنىڭ بەختىنى كۆرۈشنىڭ ئۆزىمۇ بىر بەخت !.....
سېنىڭ ئاۋازىڭنى ئاڭلىغۇم بار . ئەپسۇس ، ئاڭلىيالمايمەن ! كىملەرگە يۇمۇر سۆزلەپ ، كىملەرنى كۈلدۈرىۋاتقانسەن شۇ تاپتا ؟ سېنىڭ كۈلكەڭنى سېغىندىم ! ئاشۇ سەمىمىي ، ساپ كۈلكەڭنى شۇنداق سېغىندىم ! سېنىڭ ھەممە ئىشنى كۈلۈپ ئۆتكۈزىۋېتىدىغانلىقىڭنى بىلىمەن ، ئاشۇ كۈلكەڭنىڭ ئارقىسىغا قانچىلىغان دەرد ـ ئەلەملەرنىڭ يوشۇرۇنغانلىقىنى ھەم بىلىمەن ! سەن شۇنداق ئادەم ، باشقىلارنىڭ كۆڭلىگە كېلىپ قالمىسۇن ، ئازار بەرمەي دەپ ئويلايدىغان . مەنمۇ شۇنداق بولۇشنى ئويلايمەنۇ ، بىراق ئۇنداق قىلىپ بولالمىدىم . چۈنكى بەزى كىشىلەر سېنىڭ قىلغىنىڭنى ئەسلا بىلمەيدۇ . ئۇنداق كىشىلەردە مىننەتدارلىق تۇيغۇسى يوق ، سەن ئۆزۈڭنى قۇربان قىلساڭمۇ ، ئۇلار يەنىلا شۇنداق بولۇشى كېرەك دەپ قارايدۇ .
مۇھەببەت شەخسىيەتچى بولىدۇ ، ساڭا بولغان مۇھەببىتىم تولىمۇ شەخسىيەتچى ، سېنى مېنىڭ بولسىكەن دەپ ئويلايمەن ، باشقىلار ماڭا ئارتۇقچە ! ئەپسۇس ، تولىمۇ ئەپسۇس ، بۇلارنى ساڭا دېيەلمەيمەن . قانداق قىلاي ، ئامالسىزمەن ! شۇ پەقەت يىراقلاردا تۇرۇپ ساڭا بەخت تىلەيمەن ! ئۆتكەن كۈنلەرنىڭ بىرىدە سېنى ئەسلىگىنىمدە ، ئاشۇنداق مۇھەببىتىم بار ئىدى ، ئۇ بەختلىك ئىدى دەپ ئېيتالايدىغان.....خۇشال ئۆتكىن ، ئامرىقىم !
تۆت قۇلاق قەلىمىدىن
2016-يىلى 10ـئاينىڭ 20ـكۈنى
189 قېتىم كۆرۈلدى | sansiz99 | ئەسەر يوللىغۇچى : | |
2016-10-20 0:54:10 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|