ئايلانمىغىن تېلېفونۇڭنڭ قۇلىغا
ئابدۇراخمان ئىبراھىم

كىرىپ قاپسەن،مەۋھۇم قەپەز ئىچىگە،
تور ئوينىشىڭ، ئەتىگەندىن كېچىگە.
يېمەك ئىچمەك، تۇرمۇشۇڭغا كىم ئىگە؟
ئايلانمىغىن تېلېفونۇڭنىڭ قۇلىغا.

يار تۇتۇپسەن، ئۈندىداردا ئاڭلىسام،
بەك دۆتكەنسەن، «ئەقىللىق» دەپ داڭلىسام.
قىلىقىلىرىڭ-كىچىك بالا ئوينىلام،
ئايلانمىغىن تېلېفونۇڭنىڭ قۇلىغا.

مۇشۇ پېتى ئۆتۈپ كەتسەڭ مەيلىمۇ،
ئازدۇرۇشكەن، شەيتىنىڭنىڭ پەيلىمۇ.
ئەمدى سىنى، بىر«بىكارچى» دەيلىمۇ،
ئايلانمىغىن تېلېفونۇڭنىڭ قۇلىغا.

يۆلەك بولغىن! ئاتا-ئاناڭ ھېرىپتۇ،
ماغدۇرسىزكەن، جاپا بىلەن قېرىپتۇ.
ساڭا بېقىش نۆۋىتىنى بېرىپتۇ،
ئايلانمىغىن تېلېفونۇڭنىڭ قۇلىغا.

بولار بىر كۈن،ۋاقىتنىڭمۇ سورىقى،
قايتماس ھەرگىز،ئۆمۈرنىڭ ئاتقان ئوقى.
پۇرسەت ئىدى بىلسەڭ، ھايات يورۇقى.
ئايلانمىغىن تېلېفونۇڭنىڭ قۇلىغا.

بولسۇن،سەندە ئۇلۇغ  پىلان-ھەرىكەتلەر،
ھالال ئىشلەپ،تاپقىن رىزىق-بەرىكەتلەر.
تۈگەپ كەتسۇن، يامان خۇمار-ئادەتلەر،
ئايلانمىغىن تېلېفونۇڭنىڭ قۇلىغا.

ئابدۇراخمان ئىبراھىم كورلا.
ئەمگىكىمگە ھۆرمەت قىلىڭ نامسىز قويماڭ.
2017.2.21