تىلەك

ماھىرە ئەركىن ئەتىر

ئەسلىمەم ئۇ بىر قېرى بالا،
ئارزۇلارمۇ بولغانتى مەھپۇس.
پۈتەر ئىدى مىڭ بىر ھىكايە
سۆزلۈگۈم يوق بۇ ھەقتە ئەپسۇس.

خوشاللىقنىڭ پۇتىدا زەنجىر،
ئۇ ھاياتنىڭ ھىجران پەسلىدى.
كور بولايلا دىگەن ئەسلىدە ،
تەبەسسۇملار بىر يىل يىغلىدى .

ھاجىتى يوق چۈشەندۈرۈشنىڭ،
ھەق دارىغا يەتكەندۇ ئاھىم .
يۇيدى بەلكى ھەسرەتلىرىمنى،
يامغۇر كەبى تۆكۈلگەن ياشىم.

مۇزغا ئوخشاش يۈرەكلىرىمدە ،
قېتىپ قالغان بىر تالاي ئۆتمۈش .
كۆمۈپ قوياي ئۇنى چۆللەرگە،
ئويغانمىسۇن بولسۇنچۇ كەچمىش.

كۆز ياشلارغا ئايلىنىپ قايغۇ،
قوشۇلۇپلا كەتسۇن دېڭىزغا.
چىچەك ئاچسۇن،خۇش پۇراق چاچسۇن،
مۇھەببىتىم ئايلىنىپ گۈلگە.