ساقلىدىم

 مەممەتجان يىمىت

(سانائىل ھەرپىيات ) س دىن باشلانغان

 سارغىيىپ ساماندەك سوغۇق سۇپۇدا ،

 ساقلىدىم سائەتلەپ سايەڭنى سېنىڭ.

 سۆزلىدىم سۇلارغا سۈتتەك سەھەردە ،

 سەنسىزلىك سەۋداغا سالغاندا سىرىڭ.

سېنىڭغا ساناقسىز ساپايى سوقتۇم ،

سەھەردە ،سەھرادا ،سەپەرلىرىمدە .

 سېنىلا سۆيگۈنۈم سامادا سۇلتان ،

سېزىسەن سىياقىم ،ساداقىتىمدە.

 سوزولغان سەددىچىن سېپىللىرىدەك ،

 ساچىمنى سويلاتسا سەھەردە سەلكىن .

 سىزىمەن سېغىنىپ سۈرەتلىرىڭنى ،

سېھىرلىك سۆيگۈنى ساقلىغاچ سەندىن.