قىزچاق

مەدىنە ئىبراھىم

ئاق لەيلى ئېچىلغان نويابىر كۈنى ،
رەڭ بېرىپ ئاقلىققا چىقتى بىر نۇقتا ،
جان كىرىپ مەڭگۈلۈك ماي بوياق رەسىم ،
يېقىنلاپ شۇ نۇقتا ئايلاندى قىزغا .

تۇراتتى يىراققا تىكىلىپ ئۇزاق ،
مۇڭ يېغىپ قاپقارا ئويچان كۆزىدىن ،
تەسەۋۇر مۇمكىنسىز ئىشىك چېكىشكە ،
پېچەتلىك دۇنياسى قىزچاق سۆزىدىن .

مۇرەككەپ ھېسلىرى چۇلغۇپ داۋامەن ،
قىينايتتى قىزچاقنىڭ مەسۇم دىلىنى ،
سۆيگۈنىڭ ۋارىقى ئېچىلماي بىر بەت ،
كىشەنلىك قۇلۇپقا ئايلاندى كۆڭلى .

توساتتىن نىشانسىز شىۋىرغان  بىلەن ،
تەشۋىشتە قەدەملەر يۆتكەلدى ئاستا ،
ئۇزىدى كەلمەسكە ماي بوياق رەسىم ،
قېپ قالدى ئاق پېتى مۇزلىغان دۇنيا .