كەتسە كىتەر
تۇنساگۇل ئىسمائىل(قەشقىرى)

كەتسە كىتەر ئۆزىنىڭ شورى،
قولۇڭنى تارىت يولىنى توسما.
ھەسرەتلەنمە قايغۇرما بۇنچە،
قاش كىتىدۇ قالىدۇ ئوسما.

كەتسە مەيلى تاكسى توسۇپ بەر،
ئايرىلغانغا ئۆلمەيدۇ كىشى.
ھايات بولسا كىلىدۇ قايتىپ،
پۇشايماندا ئاققاندا يېشى.

ئېچىۋەتتىم ئىشىكنى داغدام،
تېپىۋالسۇن مەندىن باشقىنى.
يوغان سۆزلەپ قىلمىسۇن جودا،
بەرىبىر ئۇ مەندىن ئاشقىنى.

ئەقىدەمگە قىلدىڭ خىيانەت،
تۇرالمىدىڭ بەرگەن ۋەدەڭدە.
ئۇنتۇپ كەتتىم كەچۈرگىن سىنى،
تىرىك تۇرۇپ ئۆلدۈڭ قەلبىمدە.

ئىگىسى بار ئادىل جاھان بۇ،
ئون بەش ئايدىڭ ئون بەش قارا تۈن.
خىيانەتچى ئاسىي كاززاپنىڭ،
تانابىنى تارتىدۇ بىر كۈن.

-تۇنساگۇل ئىسمائىل(قەشقىرى)
-2016-يىلى11-ئاينىڭ13-كۈنى