سەن پۈتمەس بىر سۆيگۈ ،مۇقەددەس قىبلە
تۇرسۇن ئىمىن شەيدائى
(شىنجاڭ يازغۇچىلار جەمئىيىتىنىڭ ئەزاسى )
قۇياشقا تەشنادۇر پۈتكۈل كائىنات ،
ياشاشچۈن ھەممىگە يۇرۇقلۇق كېرەك .
سەن قەلبىم سەتھىدە پاتماس بىر قۇياش ،
بار تەرىپ ساڭا خاس ئەزىزسەن، يۈكسەك .
ئانامدىن تۆرىلىپ ئۇشبۇ ئالەمدە ،
كۆز ئېچىپ كۆرگىنىم نۇرانە چېھرىڭ .
"كەل ئوغلۇم !"دېدىڭدە ، ئاچتىڭ كەڭ قۇچاق ،
نۇر بولۇپ جىسمىمغا تارالدى مېھرىڭ .
باغرىڭغا بۆلەندىم بوۋاق چېغىمدا ،
ۋەتىنىم سەن ئۆزۈڭ ئالتۇن بۆشۈكىم .
تۇپرىغىڭ بىر تالدىن سىڭدى قېنىمغا ،
سەن بولدۇڭ كۆكرەكتە ئۇرغان يۈرىكىم .
"ۋەتەن "دەپ تۇنجى رەت چىقتى بۇ تىلىم ،
دىلىمدا نامىڭنى قىلدىم مەن زىكىر .
تاغ -دەريا ،باغلىرىڭ ،قىر -ئىدىرلىرىڭ ،
تەپەككۈر خەزىنەمدە ئويغاتتى پىكىر .
تومۇزدا چاڭقىسام يەتكۈزدۈڭ زەمزەم ،
ياپرىغىڭ بېشىمغا بولدى سايىۋەن .
بەردىڭ سەن ھارارەت سوغدا تىترىسەم ،
سەن تۇغقان قۇياش، ئاي بولدى بىر لېۋەن .
ئۆمرۈمنىڭ يىلتىزى پەقەت سەن ئۆزۈڭ ،
سۆيۈملۈك تۇپرىغىم ئەزىز ئانىجان .
سېنىڭسىز يوق ئېرۇر مېنىڭ بارلىغىم ،
ھەر نەپەس -تىنىغىم ئەجرىڭدىن نىشان .
چىگىلگەچ مەن ساڭا يېشىلمەس بولۇپ ،
ئازاپتا ئۆرتەنسەڭ باغرىم بولدى خۇن .
نۇرلىنىپ كۈلگەندە گۈزەل باھارىڭ ،
شادلىقتىن چېھرىمگە يامراپ چىقتى كۈن .
ئاقىدۇ سەن ئۈچۈن ئىشقىم دەرياسى ،
گەز كەلسە تامچىلاپ ئاقىدۇ قېنىم .
گەر ئۆلسەم بىر زەررەڭ بولۇپ شۇ ھامان ،
تۇپرىغىڭ قېتىغا قوشۇلار تېنىم .
قۇياشقا تەشنادۇر پۈتكۈل مەۋجۇدات ،
ياشاشچۇن نۇر كېرەك -يۇرۇقلۇق كېرەك .
پۈتمەس بىر سۆيگۈ سەن ،مۇقەددەس قىبلە ،
زەررەڭدىن تاڭ كەبى نۇرلىنار تىلەك !
ئاپتور :بورتالا شەھەرلىك رادىئو -تېلېۋىزىيە ئىستانسىسىدىن
2017.3.22
16 قېتىم كۆرۈلدى | xeydayi | ئەسەر يوللىغۇچى : | |
2017-3-27 2:03:05 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|