ئەي لېۋەن
(غەزەل)
تۇرسۇن ئىمىن شەيدائى
(شىنجاڭ يازغۇچىلار جەمئىيىتىنىڭ ئەزاسى )

-ئىشقىڭدا ئۆرتەندىم !-دېدىڭ ،جانانە ئەتتىڭ ئەي لېۋەن ،
مۇپتىلالىق مەنزىلىدە مەستانە ئەتتىڭ ئەي لېۋەن .

  باغرىمدا ياندى   ئىشتىياق ،پۈتمەس  بالابولدى ئىشىق ،
ئايلىنىپ نۇرلۇق چىراققا پەرۋانە ئەتتىڭ ئەي لېۋەن .

توۋا ،ئەسىردىنمۇ ئۇزاق تۇيۇلدى قىسقا ئايرىلىش ،
 دەستىدەدەردۇ -ئەلەمنىڭ   نىمجانە ئەتتىڭ ئەي لېۋەن .

ئوي -خىيالىم بىرلا سەندە  دەرگاھىڭغا تەلمۈرۈپ    ،
تۇتىيا ئەيلەپ دېدارىڭ  ،دىۋانە  ئەتتىڭ ئەي لېۋەن .

سارغىيىپ چېھرىم ساماندەك زەپ  قىينىدى تىلسىز ئازاپ ،
ئىنتىزارلىق تەشۋىشىدە   غەمخانە ئەتتىڭ ئەي لېۋەن .

بەرمىدىڭ  دېرەك ۋىسالدىن  ئالۋۈنغا ئايلاندى قەسەم،  
داغۇ -ھەسرەت دەشتلىرىدە  سەرسانە ئەتتىڭ ئەي لېۋەن .

ياشنىغان توغراق مىسالى  بەردەم -تېمەن  ئەركەك ئىدىم ،
 چاكۇ -چاك ئەيلەپ يۈرەكنى   مىڭ دانە ئەتتىڭ ئەي لېۋەن .

يات تۇرۇپ ئەھلى ۋاپاغا لەۋزىڭنى ئۇپراتتىڭ نىچۈن ؟
ياندۇرۇپ مېھرىمگە  تەستەك ھەيرانە ئەتتىڭ ئەي  لېۋەن .

قىلساڭ رىيا ،بىلمەي راۋا كۆرگەچكە  مەجنۇنلۇقنى مەن ،
خەلقى ئالەم سۆھبىتىدە ئەپسانە ئەتتىڭ ئەي لېۋەن !...

ئاپتور :بورتالا  شەھەرلىك رادىئو -تېلىۋېزىيە ئىدارىسىدىن

2017.2.6