ئ‍ەي دوست 

مۇھەممەد ئەركىن چىن يار

ھاياتلىق يولىدا يۈرسەم گەر ئ‍ېزىپ ،
قەلىڭدە مىڭ رەت شۇم خىياللار كېزىپ .
چىن كۆڭۈل بېتىگە تىكەنلەر تىزىپ ،
يامانلىق غارىغا باشلىما ئ‍ەي دوست .

كۆزلىرىڭ كۈلىدۇ يالغان جىلمىيىپ ،
ئ‍الدىمدا سۆزلەيسەن قەسەملەر ئ‍ىچىپ .
ئ‍امەتلەر قاچقاندا ناھەق سۆز قىلىپ ،
غەيۋەتلەر چۆلىگە تاشلىما ئ‍ەي دوست .

كېتەرمىز بۇ دۇنيا قالىدۇ بىزدىن ،
قالىدۇ ياشلارمۇ تۆكۈلۈپ كۆزدىن .
پاك نىيەت قەدەملەر ماڭغان ئ‍ىزىدىن ،
شەيتانى قەستلەرنى پايلىما ئ‍ەي دوست .