مەن كەتتىم
 زۇلمىرە ئەلى

كەتتىم، ئۆزۈمدىن پۇرقەتكە كەتتىم،
قۇياشتا ئىدىم، زۇلمەتكە كەتتىم.
.
چېقىلدى كۆڭلۈم دەردنىڭ قولىدا،
سېغىنىشىمدىن ھەسرەتكە كەتتىم.
.
ئاقماقتا سۈكۈت گۈلنىڭ چۆلىدە،
مۇھەببىتىمدىن نەپرەتكە كەتتىم.
.
كۆيمەكتە ۋاقىت يالغۇزلۇقۇمدا،
قەلبىمنى ئېلىپ خىلۋەتكە كەتتىم.
.
كەستى جېنىمنى قاقشال پىراقلار،
تۈندەك بىپايان كۈلپەتكە كەتتىم.
.
سۆزلەر چاكۇ-چاك قوندى لېۋىمگە،
ھىجران بىلەن ئېھ، سۆھبەتكە كەتتىم.
.
چۆكمەكتە ئ‍ۆزۈم  جىمجىتلىقىغا،
ئايدەك قاراڭغۇ قىسمەتكە كەتتىم.