ساداقەتنى چىن مىزان ئەتسەڭ
تۇرسۇن ئىمىن شەيدائى
شىنجاڭ يازغۇچىلار جەمئىيىتىنىڭ ئەزاسى
ساداقەتنى چىن مىزان ئەتسەڭ ،
تەشۋىشلەردىن بولاتتىم خالىي .
بىئاراملىق سېلىپ ئەندىشە ،
ئاشماس ئىدى يۈرەكنىڭ زارى .
ساداقەتنى چىن مىزان ئەتسەڭ ،
ھايادىن نۇر چاقناتسا چېھرىڭ .
بولسا سۆيگۈڭ ماڭىلا تالىق ،
ئۆركەشلىسە ئاياۋسىز مېھرىڭ .
ساداقەتنى چىن مىزان ئەتسەڭ ،
لەۋلىرىڭگە سۆيمىسە "شامال " .
كۈندەشلىرىم قولۇڭ تۇتمىسا ،
كۆزلىرىڭگە بېقىپ بىمالال .
ساداقەتنى چىن مىزان ئەتسەڭ ،
ئىشرەت كويى قىلمىسا قامال .
دىل خانەڭدە تۆنەپ قالمىسا ،
بەڭۋاش سۆيگۈ ئەپكەلگەن خىيال .
ساداقەتنى چىن مىزان ئەتسەڭ ،
باسماس ئىدى كۆڭلۈمنى تۇمان .
ئىزتىراپلىق ئىچرە ۋۇجۇدۇم ،
تىترىمەستى ياپراقتەك بۇ ئان .
ساداقەتنى چىن مىزان ئەتسەڭ ،
بولار ئىدىم شۇنچە خاتىرجەم .
بولسا قەلبىڭ كىرسىز -بىغۇبار ،
پاك سۆيگۈمنى سۇناتتىم مەن ھەم !
ئاپتور :بورتالا شەھەرلىك رادىئو -تېلېۋىزىيە ئىدارىسىدىن
5715 قېتىم كۆرۈلدى | xeydayi | ئەسەر يوللىغۇچى : | |
2017-4-14 20:41:26 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|