ياخشىلار
دىلزات ئابدۇماناپ (ئەركە )
تەرىپلىسەم تۈگىمەيدۇ ئەجرىنى ،
توغرا يولنىڭ ئەلچىسىدۇر ياخشىلار .
شۇڭا كۈيلەپ ئېيتمىدىقمۇ ھەر دائىم ،
ياخشىلارغا ئاتاپ تالاي ناخشىلار .
جان راھىتى خۇددى سۈزۈك بۇلاقتەك ،
ياشارتىدۇ ئۇ كۆڭۈلنىڭ بېغىنى .
گۇمران قىلار ياخشى ئەمەللەر بىلەن ،
شۆھرەتپەرەس،نادانلىقنىڭ دېغىنى .
يامانلارنى ئەزىزلىمەس خەلىقمۇ ،
چۈنكى ئۇندا تاغدىن ئېگىز كىبىر بار .
ياخشىلارغا خۇشتار شۇڭا بۇ ئالەم ،
ياخشىلاردا ئۈزۈلمەس بىر مېھىر بار .
ياخشىلاردەك بولاي دەيمەن ھەمىشە ،
يامانلارنى ياخشىلارغا قۇل دەيمەن .
ئۇزۇن ئۆمۈر نىسىپ قىلسا خۇدايىم ،
بالامغىمۇ ياخشى ئادەم بول دەيمەن .
ئەيىپلەرنى كۆرسىتىشكە ،تۈزەشكە ،
تاپالمايسەن ياخشىلاردەك ئەينەكنى .
مىسالى شۇ ،چاي ئىچكەندە ئۇنۇتما ،
سېنىڭ ئۈچۈن ئوتتا كۆيگەن چەينەكنى؟
ياخشى بولساق ئەلمۇ بىزدىن سۆيۈنسۇن ،
ساقلىنايلى يامانلارنىڭ كۆزىدىن .
يادلىنىمىز مەڭگۈ خەلق قەلبىدە ،
ماڭساق ئەگەر ياخشىلارنىڭ ئىزىدىن .
يەنە دىسەم يەنە سۆزۈم تۈگىمەس ،
پاك قەلبنىڭ ئەلچىسىدۇر ياخشىلار .
ئەل ئۇلارنى سۆيسۇن ھەمدە سۆيۈنسۇن ،
ياخشىلارغا ئۈزۈلمىسۇن ناخشىلار .
2015.11.27
112 قېتىم كۆرۈلدى | delzat8 | ئەسەر يوللىغۇچى : | |
2015-12-17 0:55:25 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|