كىرپىكلىرىم جۈپلەشكەندە تالىق ۋىسال

تۇرسۇن ئىمىن شەيدائى

سېنى سۆيۈش تەقدىرمىكىن چۈشۇمدىلا ،
كىرپىكلىرىم جۈپلەشكەندە تالىق  ۋىسال .
سىردېشىمىز قورۇنماستىن بىزلەر  راسا ،
رەستىلەردە ،ئېتىز ،باغدا يايراپ  خۇشال .

ئويغىنىپلا   تاڭدا توخۇ چىللىغاندا ،
 ياندا سەن يوق   غېرىپلىققا بولىمەن يەم .
سېغىنىشلار پۈكۈپ قەددىم   ئۆتتۈم تەنھا  ،
سىمايىڭنى كۆرەلمەستىن  باسىدۇ  غەم .

كېچىلەرگە بولۇپ قالدىم تەقەززامەن ،
كۈندۈزلىرى  كۆرسەتمىگەچ ئەسلا  دېدار .
پەرىزاتمۇ ، ياكى ئىنسان ئېيتقىن لېۋەن ،
تېگى -تەكتىڭ  بىلەلمەستىن ھېسلىرىم زار .

چۈشلىرىمدىن  يۈتكىنىڭ يوق بىرەرمۇ  تۈن ،
بۇنداق غەيرى ئۇچرىشىشتىن ئەقلىم ھەيران .
كويۇڭدىمەن - رايىم   ئەسىر بولدى  پۈتۈن ،
ئىشىق ئوتى  قۇدرىتىنى ئەيلەپ ئايان .

بىرەر  دەقىق ئايرىلىشنى كۈتمەس ئىدىم ،
ئەي دىلرابا  مىسكىن روھىم ساڭا مۇھتاج .
ئارامىم يوق   ھەريان كېزىپ كۆپ ئىزدىدىم ،
تاپالمىدىم ، نىچۈن بۇنچە تەلىيىم كاج ؟

دېرىگىڭنى قىلىپ يۈردۈم مەن دەممۇ -دەم ،
باش چايقىدى ئۇچرىغانلار ئاشتى دەردىم  .
نىگاھ سالسام رەستە ،ئېتىز ،باغلارغا ھەم ،
بويۇڭ پىنھان بارچە جايدا ، يىغلار قەلبىم .

يۈرسەم ساياق پىراغىڭدا تىنماي   مەجنۇن ،
ئۇچرىغانلار سوغ كۈلۈشۈپ ئەتتى مازاق  .
نۇرانە تاڭ بارچە جاننى  ئەتسە مەپتۇن ،
ئاھ ،سېنىڭسىز مەن ئاشىققا بولدى دوزاق .

ئىلاجىم يوق ،ئالۋۇن سۆيگۈ  ياركەن ماڭا ،
جىلۋەڭ بىلەن چۈشلىرىمگە كىرىۋەرگىن .
باغرىم قانسۇن ئۇيقۇ پەيتى  دېدارىڭغا ،
سۆيۈندۈرۈپ لەۋ شەربىتى بېرىۋەرگىن  !

2017.2.8   كەچ سائەت ئىككىدە يېزىلدى